假期前有唔少投資者買入恒指牛證,博羊年首個交易日紅盤高開,但昨日恒指僅高開84點,已見了全日高位,之後仲掉頭下跌,所以一開波無沽出手上牛證的話,真係大後悔。雖然大市尋日即市唔係升好多,但由於一度突破24,900點關,所以有19隻熊證被強制收回。

昨日認股證 / 牛熊證市場數據

大市連升六個交易日,但昨日恒指收陰燭,走勢明顯轉弱,若非騰訊(00700)力撐,恒指難以力保不失,有投資者見走勢唔對路,先行平掉手上的好倉,昨日牛熊證市場整體好倉比例由假期前的49.91%,回落至昨日的48.16%,至於認股證市場整體好倉比例亦由88.46%降至86.72%。

中石化(00386)假期前一度升逾4%,昨日回吐1.07%,以6.45元收市,吸引資金趁低買入其認購證,昨日市場共有995萬元資金流入中石化認購證。

滙控(00005)昨日收市後公布業績,表現遜於預期,加上近日股價明顯積弱,料今日會有一定沽壓,並有機會跌穿一年低位69.75元。假期前有投資者已率先收集其認沽證,而昨日滙控以72元收市,微升0.06%,若看淡滙控不妨小敲滙豐瑞信沽(17035),行使價67.78元,溢價8.65%,到期日今年六月。