期指攻略:動力減弱伺機開淡倉
羊年第一個交易日,A股未復市,港股成交疏落,吹着無定向風。恒指開高84點,以24,916點開出後,未幾被獲利沽盤影響,指數最低見24,664點,跌168點,開市不夠半小時全日高低位已出現之下,餘下時間,指數逐漸收復失地,恒指最後收24,836點,微升4點,主板成交僅493億元。
恒指期貨走勢
即月期指日市高水27點,收24,863點,不過收市後滙控(00005)業績差過市場預期,夜期早段跌過百點。港股拉牛上樹一樣,錄得六連升紀錄,昨日指數見24,664點低位後拗腰,守住10日線,可見交投不足,就算睇淡短期大市的大戶,亦不敢肆意出手,等候時機成熟。
滙控會否成為短期調整最後一根稻草?睇番股價一月下旬見69.75元的兩年新低後,反彈至73至74元已見明顯阻力,如果70元頸線再失守,好大機會向65至67元方向進發,對大市構成一定的壓力。
國企指數尚未能升穿12,090點收市,破近兩個月以來浪頂下移的形態,港股已處於相對高位而缺乏動力再上,個人感覺周三A股復市,港股借勢調整,會較爆上衝多浸的機會為大,今日會嘗試在24,750至24,850之間開淡倉,止蝕訂於24,975點。