Fundman睇市：中廣核電異動可吼

數數單在歐洲，丹麥、瑞士、瑞典、德國、芬蘭、奧地利，荷蘭、法國及比利時所發行的兩年期以內債券，經已通通出現負息情況，丹麥、德國及瑞士更係五年期都見負息。如果看官唔明，簡單講就係投資者要畀息，先可以經國債借錢畀呢幾個國家，對我等一世人都以為借錢有息收的普通人來說，當然好難理解借錢畀人仲要蝕息的原因，只能夠解釋因依家全世界經濟低迷，國家可以賴債，銀行可以倒閉，西方存款保障又會有上限底下，債商及超級有銀士，情願畀多少錢財政實力相對雄厚國家當保護費，換取特定時間內，可以安全將大部分本金取回。

人行放水冇停手

各國央行鬥掟錢下，人行意外降準，對股市刺激作用大減，尋日人行繼續放水舉動，為14及21日期合共進行1,600億逆回購，滬綜指再升15點，收3,173點，但見港股升至24,500點附近已無以為繼，恒指收市升幅收窄至107點，報24,422點。

睇番經濟數據，一月中國官方PMI跌穿50盛衰分界線，是廿八個月以來首次，通脹收縮到得0.8%，上月進口急跌近兩成，可見內需萎縮情況嚴重，賓架老友啱啱返內地見公司，回港後話反貪腐影響估唔到一啲都未減，春節前三公消費跌到落冰點，咁睇內地二月數據更差都唔奇。其實，中國貨幣供應轉向寬鬆係鐵一般事實，只係其他國家做得更盡更狠，人行對比慢半拍，睇怕今年除繼續減息、減RRR之外，有需要加快人民幣貶值步伐，先至有較大的機會保到個七。

內房股值得睇好

按中國放水的方向去諗，羊年之初，依然值得睇好的是內房股，一來短期樓價見底，二來按揭息回落點都有幫助，惟獨人民幣行番轉頭，之前狂發的美元債會唔會帶來匯兌損失，是當中隱憂，故只宜選財政較佳，項目集中在一線城市的兩三隻龍頭股。

再數落去，人仔低息期，業務具防守及派息能力較佳的，例如電訊股會是必然之選，昨日街外傳三間電訊商重組，雖然被多方面立即否認，但見隻中移（00941）完全唔肯回，可見基金經理的睇法有幾堅定。至於中資金融股，銀行看來已炒到水尾，睇落唔夠內險吸引。

中央大力推動潔淨能源發展，重啟核電投資後，在港唯一選擇，是佔內地核電市場近三分之二份額的純核電營運商中廣核電力（01816），舊年底以每股2.78元上市，迅即被MSCI指數睇中，炒到上3.66元，之後拾級向下，一來基礎投資者及指數基金已經坐齊貨，未見新錢入貨，其次早前個市驚內地火電供大於求，影響核電設備使用率，形成中廣核電的投機味急降。

不過，話晒做半獨市生意，中央又承諾咗全國核電發電機組容量，一四至二○年會增加220%，基金唔買都無其他選擇。近排見股價成個月在3元邊附近徘徊而跌唔落，雖然一五年18.5倍PE，唔算極之便宜，但勝在故事獨家，而其他潔淨能源股好似龍源（00916），PE都講緊15至16倍，尋日終於有異動，短期不妨睇實。