港股持續偏軟，恒指上周五跌86點，報24,679點，國指則跌91點，報11,697點，主板成交759億元，下跌的股票有737隻，升的只有495隻。

美國新屋動工量持續上升，為創科提供有利的經營環境。 （資料圖片）

內地股市持續受壓，人行研究局局長陸磊指，央行是次降準旨在對金融體系流動進行預調微調，並將金融資源動員至實體經濟中，不是「強刺激」和全面「放水」，並未開啟降準通道。在市場憧憬幻滅下，滬綜指跌60點，收報3,075點，唔單止跌穿上兩次低位3,100點，連50日線都穿埋，睇嚟滬綜指今轉好大機會下試3,000點關口。

上周四顯著受壓的電力股，周五延續跌勢，華能（00902）及大唐（00991）再跌逾4%，華電（01071）亦跌3.2%。電力股呢兩日大跌，成交急增，弱勢已成，睇嚟喺低位都有排行，相信短期即使有反彈，幅度亦有限，投資者暫時對電力股唔好有過分期望。

中燃要放長線

大市整體氣氛雖然麻麻，市場又缺乏焦點，但個別有消息的股份則逆市做好，午後發盈喜的京信通信（02342），預期全年可虧扭為盈賺1.4億元，帶動股價一度高見2.17元，最後以2.03元收市，升10.3%，由於即市已由高位回落，睇嚟盈喜因素已初步反映，即使中線有得升，都要喺2元水平整固吓先。

另外，燃氣股同樣做好，華潤燃氣（01193）升5.5%，至於阿莊投資組合持有的中國燃氣（00384）亦升4.12%，以12.62元收市。

由於燃氣股靜咗一排，周五先至有番啲鑊氣，睇嚟仲有得上，阿莊買中燃都係諗住中長線持有，家陣啱啱先有突破，可繼續坐定定。

此外，創科實業（00669）周五逆市做好，股價升2.19%以25.65元收市。創科業績表現與美國經濟及樓市有密切關係，美國十二月份新屋動工上升4.4%，而據美國商務部公布，去年全年新屋動工約101萬間，創○七年以來高點，較一三年則上升近9%，數據表現理想。若美國樓市今年延續去年強勢，料可為創科提供有利的經營環境。

截至去年六月底止半年，集團錄得純利1.36億美元，按年升15.9%，由於美國樓市表現理想，加上主要客戶家得寶（Home Depot）第三財季盈利和營業收入均高於預期，創科料可受惠，估計全年業績可延續上半年增長勢頭，股價可望再挑戰新高。