呢幾年內地房企密密手掃本港地皮，每逢政府地皮截標幾乎都見到佢哋嘅蹤影，過去一年，內房唔經唔覺已經掃咗5幅地皮，涉及金額約91億元，相信重建後總市值高達222億元。測量師老友同劉Sir講，未來內房嚟香港買地會成為趨勢，一來可「走出去」發展，二來有匯率優勢。

去年內房企來港投得五幅地皮，其中啟德發展區項目最為矚目。（資料圖片）

2014年內房來港買地情況

劉Sir計一計數，原來舊年內房獨資、合資，或者以個人名義，總共掃咗5幅住宅地，當中除咗大型住宅地，洋房地皮亦係佢哋爭奪嘅目標，市場估計呢5幅地皮重建後市值去到222億元。

爭贏啟德地最矚目

係5幅地皮當中，最矚目當然係二月保利置業（00119）「砌低」一眾本地大財團，以39.2億元高價獨資投得啟德發展區第1I區3號望海地盤，每方呎「麵粉價」達6,530元，預料落成後實用呎價1.5萬元，整個項目重建後市值約90億元。

此外，世茂房地產（00813）主席許榮茂私人公司，亦夥拍英皇國際（00163）同明發集團（00846）組成財團，以27億元投得壽臣山道西與黃竹坑徑交界地皮。英皇話成個項目投資40億元，打算建20至30座洋房，市場料落成後實用呎價約8萬元，估計項目重建後市值達70億元。

另俊和夥拍中國城市建設（國際）以21.38億元投得馬鞍山白石耀沙路，預期起400多伙，估計市值約52億元；盛洋投資（00174）參股嘅Neutron Property Fund Limited，上年年尾買入大嶼山長沙地皮，估計重建後市值約9億元。

另外仲有雅居樂（03383）副主席陳卓賢長子陳思銘係年初投得嘅坪洲教育路前坪洲公立志仁學校（北面部分），估計重建後市值約1.4億元。

港法制清晰風險低

理想城市企業估值部主管張聖典話，呢幾年內房「走出去」發展，未來佢哋嚟香港投地會成為趨勢，因為香港法制接近國際水平，佢哋先由香港落手再走向世界，做法很正常，就好似本港發展商都返內地買地發展一樣。

其次，內地發展商喺當地擁有二十至三十年房地產發展經驗，嚟當地同政府買地，做法簡單得多，風險又低，因為塊地有咩發展限制，政府都寫得清清楚楚，唔使擔心起唔到樓；再加上佢哋有匯率優勢，等於八折買地，好抵玩。