SUN MONEY：夫妻檔投資 講心又講金

前法巴輪后 趙海珠：取態不同 獨立買股

前主播之花趙海珠（Alison），由法巴輪后變身家庭主婦。雖然她一向予人剛強、獨立的形象，但沒想到其婚後與丈夫的財政和投資也是完全獨立的。「我真係唔知佢買啲咩o架，我又唔會八卦走去問佢，而我買咗咩都唔會話佢知，哈哈。」令她如此放心的原因，是因為作為「行外人」的老公，原來也是投資高手。「佢讀理科出身，數口精，做投資分析可能比我仲勁！」

她表示，兩人是於修讀科大工商管理碩士（MBA）課程時相識，並非在股場上結緣，故平日較少討論股票，反而樓市才是二人投資上的共同話題。「我哋結婚前各自持有一個物業，其中一個喺幾年前成功於政府推出辣招前沽出，本來仲以為自己好醒，喺高位沽貨，但估唔到樓價呢幾年一直有升無跌。我哋依家諗返轉頭就覺得自己蠢，如果當時有好好運用資金，再投資另一個物業，目前回報應該都唔錯。」

分散風險 避免倍輸

趙海珠又稱，由於兩人是同月同日出生，所以性格相似、生活融洽，惟獨是二人的投資取態截然不同。「先生投資較進取，試過推薦我買某隻細價股，講完個『冧把』都唔知係咩公司，但佢會夠膽大額買入，我就只會買少少，所以自己冇佢賺得咁多。如果係Double-profit（雙重利潤）就梗係好啦，但如果係Double-loss（雙重損失）咁點算？所以投資上我盡量都唔想重疊，要分散風險吖嘛。」

本周六就是情人節，未知她是否忙於照顧寶貝仔Hayden，所以未有為意這個重要節日將至。「你唔提我都唔記得添，哈哈。老公出咗差都未返嚟，不過，婚後嘅情人節，其實簡簡單單，三個人一齊喺屋企食飯已經好開心！」

ADS Securities 陳健豪：分工合作 搵得更多

ADS Securities零售市場銷售總監陳健豪（Aaron）剛於去年底加入「老襯」行列，與前電視台小花Ruby共諧連理。這對新人的投資策略，表面上雖然是「各自為政」，但實際上是分工合作，協助另一半賺取更高回報。

他稱，「我哋各自投資嘅股票好唔同，我長期持有內銀股收息，老婆反而進取啲，少買藍籌，會買異動股。佢有時會叫我幫手睇圖，做吓技術分析，喺我畀完意見後，佢又會自己做吓資料搜集，揀個別基本面較好嘅板塊投資，例如醫藥股。」

個人主攻內銀油企

近期匯市波動，帶來投資機遇，熟悉外匯市場的陳健豪雖未有伺機進行炒賣，但亦已着手收集實貨歐元，為他們日後的歐遊大計做足準備。而他個人的投資組合則仍以股票為主，除了例牌的「煎釀三寶」，即中行（03988）、工行（01398）、建行（00939）外，最近亦買入了昆侖能源（00135）、中海油（00883）等油股，並笑言，「其實每次投資賺蝕我都會話畀老婆知，不過，買股票嗰刻就多數先斬後奏，買完先會通知佢。」

他又坦言，原來早於一年多前，已與太太開設聯名戶口，希望未雨綢繆，先為下一代儲定筆教育基金。「聯名戶口啲錢唔輸得o架，所以投資策略要更加保守，暫時都仲係以現金為主。」

陳健豪即將要短暫離港工幹，因此這對夫婦婚後的首個情人節，或有機會要分隔異地。不過，這位老襯新手卻笑說：「無所謂啦，（我哋）日日都係情人節。」嗯，新婚果然特別甜蜜！

金利豐 黃德几：老婆話事 貪夠理智

金利豐證券研究部執行董事黃德几（Dickie），與太太於○九年尾步入教堂，多年來恩愛如昔，大囡Aika及細囝Arlend是他們的愛情結晶。在財圈工作多年的他，雖然早已是著名股評人，但投資方面，原來一直由老婆「擔大旗」，除因他認為女性在投資時更理性外，更多是出於對太太的信任和寵愛。

他稱，「我教咗投資課程好多年，太太都捧過場上我堂，仲好認真咁抄筆記添！但其實佢嘅工作本身都需要同數字打交道，所以由佢話事我唔擔心。大事我哋會一齊商量，小事就交畀佢決定啦，佢運氣好又腳頭好，好多嘢都揀得啱，而我揀得最啱嘅一次就係揀咗佢！」

長揸ETF 唔多炒股

黃德几指，他們的投資以長線持有交易所買賣基金（ETF）為主，反而較少炒賣股票，「我平日嘅工作係分析股票，唔想因為自己買埋一份，而影響工作情緒及判斷能力。」當遇上難得好股又唔想走寶時，點算呢？「我會叫我身邊嘅人買囉，例如我好鍾意翠華（01314），親身感受過佢嘅服務同食物質素有幾好，所以當年間公司上市，我就叫晒啲屋企人抽，佢哋都有喺高位獲利。」

提到一家四口即將入伙、位於天后電氣道樓盤「DIVA」的新居，黃德几透露背後蘊藏的二人浪漫故事。他稱，「我英文名係Dickie，我太太叫Eva，咁啱個樓盤名就係我哋兩個人英文名嘅『合體』，好似特登為我哋命名咁，加上我哋本身對區內樓盤都好有興趣，所以好快就決定買呢度。」

而今年的情人節，他表示將會舉家與父母一同飛往日本大阪渡過，是他們婚後首次嘗試捨棄「二人世界」。既然會有兩位心肝寶貝同行，相信旅程上的甜蜜溫馨必定加倍。

逢周一刊出