尋日漢能薄膜發電（00566）又再蠢蠢欲動，尾市勁抽兼破頂，以接近全日高位3.94元收市，狂飆7.3%，都係嗰句，量力而為，去年十二月暴炒妹睇過3蚊，所以今轉阻力上移到4.3元，而支持就喺10日線3.5元。

漢能從事製造矽基薄膜發電組件設備及整線生產線、CIGS（銅、銦、鎵、硒）薄膜發電整線生產線技術開發及生產、建造太陽能地面電站及屋頂電站，以及開發薄膜發電應用產品，去年上半年多賺兩成至17.2億元，原因係銷售生產線的營業額上升。

去年底出售五間附屬公司套現賺約7.7億元人仔，就係為咗進一步攪大薄膜發電業務，如收購從事生產柔性CIGS薄膜電池的美國Global Solar，有助拓展民用光伏應用產品市場。

移動通訊、移動遊戲、移動支付大家實聽得多，近日母公司漢能集團率先透露移動能源戰略，薄膜發電技術可廣泛應用於分布式發電、可穿戴裝置、太陽能全動力汽車、太陽能無人機等領域，預期三至五款太陽能全動力汽車將於十月推出。