過往兩、三年樓市受辣招影響，買家唔急於入市，所以農曆新年前市況特別靜。今年人人搶入市，連豪宅買家都唔執輸趕住喺春節前買樓，令到呢排市況出奇咁旺。新地（00016）嘅山頂TWELVE PEAKS唔夠三個禮拜連錄3宗成交，套現近13.9億元，尋日賣出嘅6號洋房，成交價逾5.06億元，呎價119,323元，除咗創項目新高之外，仲係全港洋房呎價第三高。

近期有不少豪宅買家趕於春節前買樓，豪宅物業市道轉旺。（資料圖片）

近期部分豪宅屋苑市況

TWELVE PEAKS

劉Sir喺一手住宅銷售資訊網睇到，TWELVE PEAKS的6號洋房以5.06049億元賣出，該洋房面積4,241方呎，花園2,542方呎，依家連裝修出售，呎價119,323元。今次買家可以有相等於樓價11.75%或8.5%嘅印花稅現金優惠。

帝景峰2680萬閃電售

二手市況都好火熱，好似舊年平均兩個月先錄到一宗成交嘅天后栢景臺，過去約一周罕有錄到約4宗成交。

中原施欣達話，栢景臺繼數日前一日連沽3伙後，屋苑2座高層B室，係鳳凰樓層，放盤僅一日即刻畀換樓買家以3,700萬元買入，以實用面積約1,128方呎計，實用呎價約32,801元，呎價同成交價同創咗屋苑新高。

至於港島南貝沙灣同九龍站一帶屋苑，呢幾日都連錄約3宗成交。該行林少禮話，貝沙灣4期8座高層B室，實用面積約649方呎，以約1,250萬元沽出，實用呎價約1.93萬元。美聯彭文浩稱，有買家以約1,570萬元買入九龍站君臨天下3座低層F室，實用呎價約2.1萬元。

代理老友話，近期有部分單位放盤無幾耐就成功售出。中原伍國俊話，九龍塘帝景峰帝景居2座低層B室，實用面積1,160方呎，連636方呎花園，所以放盤唔夠二十四小時，就以2,680萬元連車位賣咗，實用呎價約2.3萬元。

堅道全幢獲3.4億洽

另外，市場消息話，西半山堅道97號一幢物業，獲教會以約3.433億元洽購，呢幢物業之前租予作教育用途，據聞項目現有樓面約17,117方呎，計落呎價約2萬元。