投資物業市場交投氣氛唔錯，劉Sir見近排幾個業主都趁價好紛紛放售物業，就好似牛池灣嘉峰臺商場地下部分連一樓，近日就以約1.75億元賣咗，買家就係近排成功拆售匯八坊嘅紀惠集團副主席廖偉麟，唔知佢今次會唔會係買番嚟拆。另外，本港服務式住宅租金回報優厚，具長線投資價值，有投資者就伺機放售，VCC Land創辦人陳韻雲或有關人士放售旗下銅鑼灣V Causeway Bay服務式住宅，物業估值約12億元。

牛池灣嘉峰臺商場地下連一樓一籃子物業，以逾一億七千萬元沽出。

紀惠廖偉麟再度入市，購入嘉峰臺商舖。（資料圖片）

最新舖位及寫字樓成交及放盤概況

尋日劉Sir收到消息，嘉峰臺商場地下5個舖位同埋一樓全層，面積分別約7,000及23,000方呎，加埋約3萬方呎，以約1.75億元連約賣咗。租客包括多間教學中心、民生商舖，每個月收緊約50萬元租金，聽講仲未決定今次個商場會用嚟收租定係拆售，而原業主喺一二年以近億元向新世界（00017）購入該物業。而尋日廖偉麟已經承認咗買咗上述物業。

廖偉麟上月沽巨舖

事實上，廖氏上年已經將彩虹嘅匯八坊商場拆散嚟賣，就好似上個月佢就以2.08億元賣咗匯八坊兩個巨舖。

另外，第一太平戴維斯大中華區行政總裁李偉文話，V Causeway Bay服務式住宅放售部分為4至19樓，提供133間酒店房及服務式住宅單位，總建築面積逾7.2萬方呎，估值約12億元，而家建築呎租約45元起。睇返資料，項目○六年購入價約2.86億元，以最新估值計，物業至今升值逾9億元。

騏生五層叫價3.2億

商廈放售都唔少；中原李婉琪話，尖沙咀騏生商業中心7、8、9、14及15樓5層寫字樓物業，以公開招標形式連約放售，意向呎價1.57萬元，料涉資約3.25億元。美聯蕭惠碧話，金鐘海富中心二期低層6室相連單位以意向價約1.016億元交吉放售，呎價約2萬元。

仲量聯行鄧錫衡話，建生國際（00224）觀塘建生廣場再有多三層寫字樓租畀兩機構，涉及7.8萬方呎，呎租約23至24元，餘下9及10樓高層，將上調租金至每方呎28元。而萊坊發表報告亦話，本港優質寫字樓資本值全球最貴，每方米逾7萬美元，比第二位嘅新加坡仲要高1.5倍。