內地環保要求嚴格，加上棉花價格下跌，紡織股去年份成績表早已預咗唔會好睇，好似天虹紡織（02678）同魏橋紡織（02698）都發盈警，股價雙雙受壓，但見互太紡織（01382）幅圖曳咗兩個月之後已經重拾動力，尋日逆市升逾1%，以10.86元收市，就快見番一年高位11.21元，配合10日線升穿多條平均線，短炒目標睇12蚊關，支持10蚊。

互太主要從事紡織產品製造及貿易，截至去年九月底止，中期收入倒退10.5%至36.5億元，銷量由去年的1.01億磅，跌至0.97億磅，純利倒退18.3%至5.2億元，原因係勞工成本、染料價格上升，同埋售價下跌。期內四成收入來自內地市場，三成來自東南亞市場，兩大分部均告下跌，其中內地沿海城市出現勞工短缺，同時日圓疲弱影響日本大客UNIQLO的銷售。為咗提高營運效率，公司優化番禺生產基地產能、重啟越南工廠發展一期工程，預期三月試產，料將紓緩勞工成本壓力。另外，UNIQLO的母公司迅銷（06288）截至十一月底止首季多賺超過六成，話唔定係互太股價硬淨嘅原因之一。