上周五美股急跌，港股預託證券預示恒指可能開24,300點樓下，但昨日港股跌勢卻比預期溫和，期指以24,388點開出後，很快在24,350點確認支持，好友相當有耐性地逐少推高上落區間，最後日市收24,504點，高水19點，成交僅4.3萬張。

恒指期貨走勢

恒指昨日跌22點收24,484點，指數下跌幅度輕微，但整體大市有過千隻股份插水。早前指數攻上24,995點，留下的三個上升裂口，當中第二個裂口24,373至24,438點，昨日亦已被完全補回，只剩低23,997至240,16點的一個，不過如果要完全補回，意味23,590至24,995點的短期升浪，要回試69.7%的升幅調整，真係回得幾深。

睇牛熊證街貨分布，牛證打靶高峰在24,300至24,399點之間，相當於千一張期指，反之再殺落去24,000點，再有額外千一張左右，值唔值得？對此實在有保留，始終指數在24,313至24,369點應該有一定支持。

當然，掉轉頭即市開好倉的話，現貨指數博上去空間唔多，10日線的24,584點及上周五開市高位24,771點阻力唔細，寧願都係等破24,313點，甚至止蝕盤殺落24,126點（現貨計）至買，但出現可能性只係五五波，唔得惟有得個睇字。