好快就到農曆新年，新盤發展商配合節日為旗下新盤推出新春優惠，以及加推單位吸客。長實（00001）大埔嵐山推出「嵐山喜氣羊羊雙重驚喜」優惠，期間買入指定「1+親」組合主單位嘅買家，可獲得一部價值9.8萬嘅限量版「綿羊仔電單車」，或者攞住樓盤宣傳單張參觀現樓，都可獲得一個羊年福袋。另外，九建（00034）嘅堅尼地城加多近山喺農曆新年前原價加推4伙，星期五賣。

長實何家欣（左）表示，大埔嵐山本周五起推出「嵐山喜氣羊羊雙重驚喜」新春優惠。

加多近山原價加推4伙，星期五賣。

各新盤最新部署

長實高級營業經理何家欣同劉Sir話，嵐山本周五起至三月八日期間（包括首尾兩日）推出雙重優惠，客人買入指定「1+親」組合嘅主單位，就可獲得一部價值9.8萬嘅限量版「綿羊仔電單車」，唔要電單車都得，咁咪用嚟扣減樓價。

嵐山累套逾67億

另今日起至二十七日，所有參觀嵐山現樓嘅客人，攞住呢個樓盤嘅宣傳單張就可獲得一個羊年福袋。

發展商請咗班模特兒，著住賽車手及打氣女郎嘅服飾，會喺新界東鐵沿線幾個地點派宣傳單張。

長實營業經理楊桂玲話，嵐山到而家賣咗1,163伙，套現超過67億，平均成交呎價大約8,400至8,500蚊。

長實地產投資董事劉啟文話成個樓盤剩低唔夠190伙，其中有43組「1+親」單位，佢仲話嵐山好抵買，價錢有調整空間，但農曆新年前唔加價住。佢話嵐山售樓處最快初三或初四啟市，畀啲員工拜吓年。劉Sir仲打探到，嵐山I期三月尾入伙，星期五賣10伙。

九建堅尼地城加多近山尋晚上咗份新銷售安排，原價加推4伙，星期五賣。

中原黃小江同劉Sir話，呢個屋苑入伙以來已有12宗租賃成交，平均實用呎租約55蚊。至於香港小輪（00050）旺角亮賢居樓書尋日上網，單位面積由483至3,206方呎。

溱林洋房睇現樓

另外，新世界（00017）元朗溱林亦首次開放現樓裝修洋房嘅示範單位，實用面積2,439方呎，售價2,744.8萬，呢個盤至今賣出213伙，套現超過13億，洋房就賣咗6幢，另有2幢租咗出去。

代理後勤花紅和味。中原地產全年發放後勤嘅花紅達2,290萬元，按年增118%，其中主任級或以上獲發4.5個月花紅。