Fundman睇市：維達有追落後空間

由於年底基金經理埋單計數，通常一月又係新一年重新部署，唔少投資者都相信股市有「一月效應」，有云一月升，全年都會升，因為換貨關係，強勢股特別有參考價值咁話。回顧一月升市，有四隻藍籌，貢獻恒指716點之多，升勢其實高度集中，長實（00001）同和黃（00013）因系內重組，兩隻股份分別升13.9%及15.2%。不過，晒士所限，都仲係唔及騰訊及中移（00941）兩隻，分別推高恒指330點及221點。

近期見唔少中國基金，都對舊經濟產業無乜頭緒，索性追基數低、肯定有增長的電子商貿概念，市值大的騰訊似乎是不二之選。至於中移，亦係智能手機冧價潮受惠者。不過，在下始終偏愛未發力的聯通（00762）多些少。

再數落去，值得留意升得最多十二隻藍籌入面，當中不少是低beta或者低估值股份，除中移、聯通外，九倉（00004）、昆侖能源（00135）、華潤電力（00836）及招商局國際（00144），升幅介乎9.3至12.6%，遠遠跑贏同期恒指的3.8%升幅，就算一月效應成立，但以基金換貨動作來看，資金風險胃納看來唔高，也傾向保守。

風險資產冇市場

事實上，年初至今，十年美債息由2.2厘至跌穿1.7厘的年多低位，大孖沙對風險資產的興趣有多大，其實已相當明顯，亦唔似指數升幅顯示的樂觀。去年第四季，作為國指及滬綜指升市火車頭的中資金融類股，一月開始呈力不從心現象，可能同近期人行不斷逆回購，而唔直接減存款準備金率，令到炒人行出手預期降溫有關。眼見上周五美股大跌氣氛轉差的同時，A股升唔穿3,400點，恐防隨時掉轉頭跌穿3,000點，連累埋本地的中資及國企股都唔定。

周末，國統局公布數據，中國一月製造業PMI指數跌穿50盛衰分界線，去到49.8，國統局解釋同春節前的季節性因素，以及商品價格急跌影響有關，但個市氣氛轉弱，恐怕今日中港股市開市初段表現難免會受影響。由美國ADR及新加坡場外莊家開價表現睇，今日恒指早市開24,300點樓下機會相當大，又睇吓今年兩次短期調整都守得住的20日線（目前在24,227點水平），今次有冇支持。

中銀現價唔怕買

中銀香港（02388）有意賣旗下南商銀行，南商佔中銀資產淨值近兩成，如果作價好似外間傳聞去到60億美元，1.3倍市帳率左右，對於本身一級資產比率已達11.7%，唔等錢使的中銀而言，派特別息機會不能抹殺。上周五中銀股價見過27.7元，收市升幅收窄至2%，報27.25元，以其未賣資產都穩陣有4.5厘股息而言，升幅實在有啲寒酸，如果回到27元邊，有耐性的股民不妨入番多少。

上周提過恒安（01044），被高盛列入確信買入名單，加埋市場搵緊低原材料成本受惠股，上周五再爆多段，升3.8%去到92.25元，除咗個市真係無嘢好炒之外，真係諗唔通點解29倍PE，買氣仲可以咁強。

對手之一的維達（03331）同日出業績，去年全年賺5.93億元，升9.3%，在分析員預測的4.07億至6.35億元的中上限，期內每股盈利59.4仙。受惠於木漿成本減輕及產品結構改變，毛利率擴闊1.2個百分點去到30.2%。

業績前，大行預測維達一五年盈利6.42億元，相當於8.4%增長，看來有被上調的空間，在下估計其盈利有機會去到7.2億至7.4億元，一五年PE為17.5倍，PEG低過1倍，估值仲算合理範圍，短期看來股價有機會在追捧恒安的熱錢分流下得益，短期先睇吓破唔破到一三年底高位14.05元。