今個星期有3幅地皮截標，當中以星期四截標嘅港鐵（00066）天水圍輕鐵天榮站上蓋項目最受市場關注，呢個經歷兩度流標嘅項目再次修訂招標條款，沿用「一口價」招標形式，仲削減咗車站重置費用約39%去到2.5億元，而新地（00016）同埋會德豐地產都講明有意入標咁話。

天水圍輕鐵天榮站上蓋項目，提供逾九十八萬方呎樓面。（資料圖片）

新地副董事總經理雷霆早前指集團有意入標競投天榮站。（資料圖片）

本周截標三項目基本資料

跟住星期五再有兩幅政府地截標，分別係九龍筆架山龍翔道住宅地同埋葵涌工業地，兩地估值最高約莫15.13億元。

新地會地等表明出手

劉Sir知道，呢個本周四截標嘅天榮站項目，曾經兩度流標收場，今次第三度招標建基於對上一次嘅「一口價」模式，而今次亦設有2.5億元車站重置費用，但就比第一次招標時嘅4.1億元，大幅減少咗約莫39%。至於分紅比例就固定咗一成，港鐵將來亦有權以市價1.6倍回購呢嗰項目。

其實有部分發展商都講到明會投標，好似新地副董事總經理雷霆早排就話，集團將會入標競投。

另外還有會德豐地產同埋恒地（00012）都透露有意入標，所以劉Sir覺得今次截標反應，相信會比起項目第二次招標時錄到嘅3份標書為好，上次有份入標嘅包括新地、長實（00001）同信置（00083）。

至於九龍筆架山龍翔道住宅地同埋葵涌工業地就會緊接喺星期五截標，其中發展密度唔高嘅龍翔道住宅地，價值可以睇高一線，劉Sir相信可以吸引唔少財團入標競投。

龍翔道住宅地估11億

老友高緯環球張翹楚就咁睇，佢話呢幅龍翔道住宅地有條件打造成洋房項目，具有一定可塑性，佢覺得地皮每方呎樓面地價做到約莫1萬元水平。計返條數估值大約11.64億元，係依家市場上限價。

另一幅截標嘅地皮為葵涌勝耀街、永基路與葵福路交界工業地，地皮係上季賣地計劃嘅新增土地，同時係政府近十四年以嚟首幅工業地供應，配合經濟轉型同埋發展需要。

呢幅葵涌工業地佔地大約1.36萬方呎，提供約12.93萬方呎樓面，市場預期樓面呎價大約2,000至到2,700元之間，估值約莫2.59億至3.49億元不等。