劉Sir尋日去咗聽新任地產代理監管局主席梁永祥首次匯報該局工作報告，佢話舊年香港物業市場主要由一手樓主導，期間同一手住宅買賣有關代理嘅投訴，就接到56宗，較一三年升咗近三成，主要係無履行回贈承諾、誤導按揭申請資料同埋代客墊支等，所以局方今年會全面加強該範疇嘅工作，仲會繼續研究地產代理入票買樓申報制度。

地監局梁永祥（左）表示，去年代理被撤銷牌照個案大升四倍。旁為韓婉萍。

去年一手住宅買賣涉及代理的投訴有56宗。（資料圖片）

地產代理去年被投訴概況

地監局主席梁永祥話，去年接獲嘅投訴總共有399宗，當中涉及一手住宅買賣嘅投訴佔56宗，按年增加27%。

投訴事項主要係關於代理未有履行有關回贈嘅承諾、誤導按揭申請資料同埋代客墊支，當中有11宗係代客墊支個案，較去年增加咗9宗，該批個案中的2宗已經轉介咗去紀律研訊部，8宗就處理緊，而1宗就因為證據不足取消咗。

佢又話，其實代客墊支情況已經受到控制，違反嘅代理最高會被罰款30萬元同埋撤銷牌照，相信已經有足夠阻嚇性。

佢話，已經處理咗嘅整體投訴宗數，去年有478宗，其中48宗同一手住宅買賣有關，當中有12宗成立咗，包括咗代客墊支、失實陳述、未有履行回贈承諾同埋違反廣告守則等等。

去年釘牌53宗新高

而去年被撤銷牌照數字錄53宗，按年大升咗四倍，喺歷年來新高，但主要喺同持牌人被刑事定罪或者破產有關；而暫時被吊銷牌照就錄得12宗。

地監局行政總裁韓婉萍話，其實去年主要對代理嘅投訴，包括提供不準確或具誤導性嘅物業資料，好似物業狀況同面積咁、無妥善地處理臨時買賣合約同未解釋其內容、未有同客戶訂立或解釋地產代理協議同埋沒有進行或無提供土地查冊等，以上常犯嘅錯誤，將成為當局今年重點改善項目，會研究提高罰則嘅可能性。

佢又話，早前提過嘅代理入票申報制度，仍有技術性問題要面對，預計半年後再公布進展。

報考人數連跌四年

睇返該局資料，原來去年地產代理同埋營業員依兩個資格考試總考生人數加埋有8,563人，按年跌咗19%，已經連續四年下跌，而個人牌照總數錄35,502個，按年就輕微跌咗約1%。

韓氏又話，雖然地監局倚靠牌照收入，但暫時都唔會諗住加牌費，同時亦都唔會減牌費吸引考生入行。