恒指經過五連揚之後，尋日終於後勁不繼，恒指早段高開85點，見了全日高位，之後內地公布去年十二月份全國規模以上工業企業實現利潤總額按年跌8%，令大市氣氛進一步轉差，恒指最多跌236點，低見24,672點，但尾市收復部分失地，最後只跌102點，收報24,807點，國企指數則跌197點，收報12,030點。

隨着生活及收入水平不斷提升，內地對食水品質的要求日漸提高。（資料圖片）

內地股市昨日亦回吐，滬綜指跌30點，收報3,352點，金融及地產股有沽壓。平保（02318）及國壽（02628）均跌超過2%，於內銀股普遍亦錄得超過1%的跌幅。

中資金融股尋日跌落嚟，成交明顯增加，今次會唔會好似上個禮拜咁，好快抽返上去，真係無人知，但睇番佢哋嘅走勢圖，好多RSI已出現背馳，所以投資者千祈唔好一廂情願以為佢哋跌完一定彈得返，急急走去撈底，如果唔係隨時中招。

萬達商業唔夠力

昨日提及的萬達商業（03699），果然一如阿莊所料，在多間大行一齊出報告之下都唔多吹得起，尋日最高只係見過49.95元，50元掂都無掂過，埋單跌0.3%，收48.9元。現時內地經濟正走下坡，加上受電子商貿的威脅，萬達當然首當其衝，加上佢實在太「大隻」，即使有得升，升幅亦都有限，所以阿莊認為搞唔過。

早前高盛出過報告唱好隻浩澤淨水（02014），股價在報告出街當日及翌日都有唔錯表現，最高升過上3.84元，但之後回返晒，最低仲見過3.23元，阿莊仲以為佢咁快玩完，但係上個禮拜四佢成交突然大增，有76.8球大手上板，可能是專登壓低股價過貨都未定。之後浩澤走勢明顯好轉，尋日再升7.91%，以3.68元，差唔多升返去前高位。

浩澤為內地淨水服務供應商，隨着國民生活及收入水平不斷提升，對淨水服務的需求將與日俱增。為配合未來市場的高速發展，集團不斷提升產能，旗下位於陝西省第二期生產設施已於去年八月投產，令公司產能由17萬台升至37萬台，對進一步擴展市場佔有率有利。

高盛將浩澤的目標價訂在6元，較昨日收市價有超過六成的上升空間。技術上，股價由低位開始形成上升通道，尋日仲升穿埋十日及五十日線水平，即使唔睇到6元咁遠，短中線要挑戰4.5元應該無乜難度，所以阿莊計劃今日睇位買番五萬股。