樓價愈升愈癲,買家跨區買樓已經好平常,尤其細價樓供應最多嘅新界區就最多,沙田第一城兩房單位400萬元以下放盤啱啱被搶晒,已經宣布無晒放盤。就算屯門時代廣場一房細單位,亦畀外區投資者買到近「四球」,實用呎價逾1.22萬元,仲創埋全區傳統屋苑紀錄;難怪市民同代理都預期,今年樓價都會繼續升。

新界區細價樓供應多,吸引不少外區客入市。(資料圖片)

外區客跨區買樓實錄

美聯黃錦瀚同劉Sir講,沙田第一城兩房交吉放盤全部叫價都已經貴過400萬元,就算連租約380萬至390萬元都未必有貨,其實本區客早已被高價嚇親,入市買家佔六至七成都係來自市區或者大圍、馬鞍山。

屯門時代實呎破萬二

其實第一城三房單位亦都唔憂賣,劉Sir收到風,同屋苑30座低層三房單位,賣473萬元被人撻咗,再賣番480萬元。另一個5座低層大單位,傳外區客797萬元買咗,實用呎價9,333元。

祥益袁思賢講,屯門時代廣場一日錄2宗一房單位買賣,其中E座極高層單位,實用面積約325方呎,反價8萬元後,獲嚟自外區嘅投資客以約398萬元買咗,實用呎價約12,246元,呎價破盡屯門市中心傳統屋苑新高紀錄。

買家搶購低水樓,間接推高樓價。利嘉閣劉浩勤稱,將軍澳日出康城近兩日連錄6宗買賣,今個月已有80宗買賣,佔70%為外區客,依家三房單位約600餘萬元都有貨。美聯劉卓豪講,同區怡心園2座高層C室,外區年輕上車客,追價18萬到478萬元購入。

市場有人爆料,沙田花園城1期1座中層疑似事故單位,賣366.8萬元被人撻咗,即刻再賣366萬元,實用呎價約1.13萬元;同區富豪花園碧華閣事故同層戶,賣738萬元,低市價10%,實用呎價約8,030元。

66%準買家目標細價樓

高力國際研究及諮詢經理李梓瑈都話,樓價係咁升,市民供樓負擔能力跌,惟有買細單位,預期今年中小型住宅會有強勁需求,新供應遠水救唔到近火,預測今年中小型私宅樓價再升3至5%。

GoHome.com.hk喺去年十一月訪問咗逾4,000位市民,71%受訪者認為今年上半年住宅供應唔夠,過半數更認為上半年樓價會有一成或以下升幅;另受訪者之中,有約66%有意買500萬元或以下的單位,可見呢類細價樓需求幾強勁。