A股的「119」股災後，基金經理反而群起唱好，認為震倉是A股及H股的買入機會，港股連升三日，昨日再升170點，收報24,522點，創近四個月新高。

恆指期貨走勢

好友似乎有水晶球，對於昨晚歐洲央行的量寬規模極表信心，昨日期指以24,425點開出後，很快在24,389點覓得支持，最高見過24,599點，現貨收市後，表現與前日好友臨尾市落雨收柴唔同，期指高水幅度反而擴大，日市收24,580點，高水57點，成交5萬張。

反而國期走勢卻不及恒期，早市見過12,224點高位後，午後跟A股級級落，最後以12,077點收市，成交8.4萬張。

筆者多次提到，今浪港股可否打破近季的上落市悶局，恒指由炒滬港通通車前高位25,362點，之後回落見22,529點，中期的反彈0.618阻力24,280點十分微妙，昨日第二日收於阻力線上，形勢上利好後市。

不過，對於炒二三線股的股民，這類高度集中個別板塊的行情，搵食並唔容易。

昨日升市，下跌股份仍然比上升股份多，基金經理追逐重磅、落後的指數權重股以及中型股份，二三線跟消息炒，換貨率相當高，如果唔係貼市股民，可能一動不如一靜，買番中資銀行及保險股，或者仲相對划算。