人行重啟逆回購，向市場釋放500億人民幣資金，看來是應對近日人民幣拆息回升的放水措施，成個市都賭緊中證監搵藉口打擊券商融資後，好快會有降準消息出台，加埋美股又連升三日，港股強勢畢呈，升170點，收24,522點，大市成交995億元。尾市期指高水仲要愈拉愈闊，期指客似乎唔當尋晚歐央行開會係一回事，好似預咗量寬會送大禮一樣。

國美發盈喜，估計去年度盈利錄得約四成增長。（資料圖片）

太陽日誌

查實由瑞士央行頂唔順，被市場先生擊倒放棄干預匯價升值，到尋日意大利總理倫齊出席世界經濟論壇時，打晒開口牌話歡迎歐元貶值，期望見到同美元一兌一，尋晚歐洲央行開會大有山雨欲來之勢，且看今浪港股唔可以趁機試番去年九月魚缸對滬港通表錯情，盲舂舂炒出嚟的高位25,362點。

炒4G上客數字受惠於低價手機氾濫，中移（00941）再升1.1%，收103.3元，少少意外係昨日品題的聯通（00762）升得0.6%，輸畀中電信（00728）的2.2%升幅。不過，中資電訊股短期仲係手頭唔夠倉底要急急追貨的基金經理杯茶，可放心捧場。

內銀可炒多轉

隨着人行短期放水預期升溫，俗語話buy on rumor，消息確認前，一味夠平的內銀股，應該可以炒多一轉。在上述一堆大市值低PE股份受追捧下，尋日二三線股表現相對失色，上升及下跌股份比例46對54，跌多升少之局，短期睇怕又回到炒大（價股）唔炒細的局面。

海嘯後，港股的低位支持有逐漸上移的趨勢，但就算港股近日逐級上，同七年前的32,000點比較，仲有一大段距離。講到底，過去幾年，無其他投資好過買磚頭，全球央行的印銀紙救市，未谷起全球通脹及經濟回到「正常水平」，就先推到資產價格去到瘋狂的高峰。

港樓貴絕全球

早兩日有個「全球最難負擔樓價」調查，香港五度蟬聯冠軍，平均要17年家庭收入，先夠買到一層中位數樓價物業，樓價貴絕全球，第二位係溫哥華，要10.6年收入，再數落去係澳洲悉尼的9.8年。統計數字有冇誇大？以舊年第三季香港家庭收入中位數大約28萬，17年相當於476萬，以最近居屋都賣到四、五百萬，話香港樓價惡頂應該唔算誇張。

本來一個地方樓市，點都會同勞動力收入多寡直接掛勾，但回歸後，香港人要同內地豪客爭，樓價亦同市民負擔脫節，最近史提芬有溫哥華親友想置業，但同樣因大陸移民炒貴關係，搞到當地買家好難上到車，睇落樓市惡頂指數，其實變相是內地人最想移居地方排名似啲。

○九年充當白武士，認購國美（00493）可換股債券的貝恩資本，悉售手上9.22億股國美，作價1.13元。貝恩當年以18億認購國美換股債券，行使價1.108元，去年以1.31元沽掉7.69億股，今次將剩餘貨尾平手價清貨。貝恩同國美高管唔多咬牙，賓架界屢有所聞，分手消息未算太意外。

咁啱得咁橋，貝恩一沽貨，國美就出盈喜，尋日傍晚話一四年度業績，門市收入有4.5至5%增長，電子商貿交易則按年勁升八成，單是第四季度電子商貿收入按年會有一倍升幅，而全年利潤估計會大升四成左右，份通告有穩住因貝恩沽貨而動搖的其他投資者的味道。

以國美一三年全年賺8.92億元（人民幣．下同）計，即全年賺12.48億元，介乎街外預測11.5億至14.2億元之間，但綜合毛利率改善到18%，又確係唔錯，尋日股價企住批股價樓上，貨源似乎落響強手之中，以批股價作止蝕，短期可以留意。