本港私宅租金屢試新高，但樓價亦「嘭嘭聲」咁升，所以依家住宅租金回報唔係好高。高緯環球就認為，以依家平均租金回報率約2.58厘計，若果嚟緊加息1厘，咁就同無回報無分別，所以業主肯定會加租去抵銷加息成本。佢估計到時住宅租金會有8至10%升幅。其實租金近年都升咗唔少，中原話舊年100大屋苑租金按年升咗約10.4%，平均建築呎租報約25.4元，再創歷史新高。

高緯環球大中華區評值諮詢部董事張翹楚（右）預期，私宅租金有機會再升8至10%。左為該行香港投資部執行總監方智傑。

紅磡黃埔花園平均建築呎租逾三十元。

去年租金升幅較大屋苑

住宅租金一早已經升穿頂，但係嚟緊好大機會加息，到時勢刺激租金出現另一個升浪。

劉Sir老友高緯環球張翹楚話，依家住宅平均租金回報率約莫2.58厘，假設再加息1厘，基本上等於無回報，睇怕加息成本好可能會反映喺租金上面，到時整體住宅租金睇升8至10%。

佢仲話，舊年豪宅市場受辣招影響，但係部分豪宅區樓價繼續出現破紀錄新高價個案。佢估計，今年樓價3,000萬至1億元嘅豪宅，樓價會有約莫5%升幅；而舊年供樓負擔比率約57.6%，如果未來加息3厘，比率會去到74.9%咁多，到時同九七年差唔多。

平均建呎租$25.4新高

另外，中原黃良昇就同劉Sir講，睇返自己間行新簽租約統計，舊年十二月全港100個大型私人住宅屋苑嘅平均建築呎租約莫25.4元，按月再升約0.8%，已經連續七個月創歷史新高，比起一三年底錄得嘅23元，升咗約10.4%，唔經唔覺連升六年。

黃埔去年升18%最標青

統計番本港十大屋苑，舊年租金全線報升，其中有7個屋苑嘅呎租升逾一成。當中又以紅磡黃埔花園租金的升勢最勁，按年足足升咗約18.5%，平均呎租最新報約30.1元。

其次，藍田麗港城同埋鰂魚涌太古城，舊年十二月嘅平均建築呎租分別約24.9及34.5元，亦按年錄約17.5%及15.8%升幅。該行估計，今年第一季租金會繼續有溫和升幅。

另一方面，在工商舖市場方面，高緯環球方智傑就估計，今年商廈及工廈售價會有超過5%升幅，但就唔係咁睇好核心區舖位，估計會有約5%嘅跌幅。