自從內地個人遊人士轉攻中低檔消費品後，本港核心區零售商戶大洗牌，購物區真係少咗好多鐘錶同珠寶店，多番化妝品店等重新進駐。近四個月已經至少有9宗化妝品店進駐個案，主要集中喺旺角區，當中有3宗係取代高檔消費品商戶個案，另亦有本地化妝品連鎖店連租兩個旺角街舖，踢走鐘錶同相機店。有代理話，高檔消費品商戶「佔領」核心區舖位的比例會持續減少。

旺角區舖位近期連錄化妝品店承租個案。（資料圖片）

近月由化妝品店承租的核心區舖位

睇番過去幾年，內地個人遊消費品需求集中喺高消費品，帶動鐘錶、珠寶同影音產品等商戶高價喺旺區搶舖，開到成行成市。

本地薑高8%連租兩舖

不過，形勢唔同晒，高消費品需求大跌，生意額減少，好多賣高消費品嘅商戶都喺租約期完結後唔再續租，原有舖位，更加由本地化妝品連鎖店取代。

有老友同劉Sir講，近月有本地連鎖化妝品店接連承租旺角兩個地舖，其中包括旺角彌敦道612至618號地下單號舖，面積約240方呎，以約42萬元承租，呎租約1,750元，前租客係連鎖鐘錶店。

另一個舖係西洋菜南街一個單號地舖，面積約800方呎，租金65萬元，較舊租金高約8%，原租客係相機店。

西洋菜南街舖位除咗吸引本地連鎖化妝品店外，外國化妝品店亦進駐，其中，一個原先由手機零售商租用嘅雙號地舖，面積約1,500方呎，近日滿約搬走，由韓國化妝品店以約88萬元頂上，新租金較舊租低逾2%。

另同街雙號地舖連閣樓，面積約1,000方呎，亦獲韓國化妝品店以月租75萬元承租，較舊租高約20%，據講，前租客係服裝店。

內地客轉攻中檔消費

高力國際麥海倫話，過去十幾年，零售業一直針對內地旅客，向高檔消費品市場傾斜，不過依家內地人改為主攻中檔及民生消費品，佢相信未來核心區高檔消費品商戶數量將會減少，取而代之係售賣中檔消費品嘅商戶。

港置林偉文亦都話，化妝品市場成本低，利錢高，加上內地旅客需求強勁，所以可以在逆市中繼續擴充。