今年核心區同新界區舖市走勢會好唔同，舊年核心區好多舖位租金都下跌，新界區舖位租金就上升。昨日DTZ戴德梁行同劉Sir講，呢個情況會繼續落去，今年核心區內一線街舖租金會跌5至10%，區內二、三線街舖更會跌10至15%。非核心區嘅新界區舖市方面，佢地就睇好屯門、元朗同荃灣等區，預計舖租會穩步上升，有10至15%升幅。

新界舖租今年預料穩步上升，其中尤其看好元朗區。(資料圖片)

DTZ戴德梁行林應威（左）稱，今年核心區與新界區舖市走勢會迥異。中為陶汝鴻，右為阮仲賢。

新界區部分舖位租務成交

DTZ戴德梁行香港商業部主管林應威話，過去多年內地旅客續有增加，但消費模式變咗唔少，減少咗買珠寶同鐘錶類貨品，所以有好多該類商戶嘅核心區舖位租金走勢明顯向下。

核心區一線舖估跌10%

他估計今年核心區一線街舖租金會跌5至10%，而二、三線街舖跌幅更大，料跌10至15%。

至於新界區舖市，林氏話，內地旅客對民生貨品如藥品、化妝品或食品等需求非常強勁，所以睇好屯門、元朗及荃灣等地區舖位，預計該區舖租今年會穩步上升，有10至15%升幅，而事實上，區內舖租過去數年已累積升咗約三成。

該行寫字樓代理董事阮仲賢亦話，去年全年全港整體商廈吸納量錄得約68.7萬方呎，按年升咗4.15倍，主要集中喺非核心區，如尖沙咀及九龍東，佔咗約46.5萬方呎，而中環及金鐘區因為有幾幢商廈租約到期而釋出唔少樓面，區內吸納量因而大跌，由去年第三季的淨吸納量21,932方呎，跌至上季的110,987方呎負吸納量。

該行香港區董事總經理陶汝鴻預計，今年各區寫字樓租金可望有最多5%升幅，但係九龍東商廈租金受累於供應增加，料有最多5%跌幅。

The Mark意向呎租23元

另外，劉Sir噚日撞見鵬里集團物業經理梁翠貞，佢話旗下觀塘偉業街活化工廈項目The Mark已經峻工，其中一中高層全層已獲IT公司以呎租23元承租，另有六層獲洽租，意向呎租16至23元，如果全幢物業都租出哂，料租金收入有約2,000萬元。