去年東方電氣（01072）走勢一浪高於一浪，尋日股價再升3.3%，收報15.32元，即市創下一年高位15.4元，東氣A股（600875.SH）更加漲停，收報23.19元人仔。東氣去年首三季純利倒退42.3%至10.9億元人仔，發電設備產量2,825萬千瓦，期內新增訂單255億元（出口訂單佔4.2%），其中高效清潔能源佔59%、新能源佔22%、水能及環保佔7%、工程及服務佔12%，新能源佔比較前年的8%大升。四大主業毛利率跌2.78至7.73個百分點不等，令整體毛利率亦由19.19%降至15.32%。

一四年度業績如何，唔多唔少已經估到，不過東氣除AH折讓吸引外，市場呢幾年對新核電項目重批嘅憧憬，一五年話唔定可以兌現，事關二○年核電裝機目標5,800萬千瓦，距離目標時間相當緊迫。另外，近日總理李克強話要鼓勵電力裝備股走出去，提及若在海外修建電廠，更可帶動內地鋼鐵出口。今年內地加快推行各項改革，而混合所有制係重點之一，核電工程亦有條件引入民資，東氣乃行業龍頭，未有貨嘅話，不妨喺14蚊邊跟進，支持13.72元。