希臘可能脫離歐元區的消息，使環球金融市場在一五年有一個立立亂的開局，隔晚道指又跌過百點收場，焦點係美國債市，資金繼去年十月後，又一次出現恐慌性買入美債避險，美國十年債息一度跌到去1.88厘，收市前稍為平復，收1.96厘，但依然是過去一年半以來，第一次收市低於2厘水平。

騰訊QQ及微信的龐大用戶群，是微眾銀行的優勢所在。（資料圖片）

太陽日誌 2015/1/8

券商預測騰訊業績（人民幣）

外圍死死吓，連插咗兩日的港股，反而來一個釜底抽薪，真係估佢唔到。大市低開後逐步被死貓彈的濠賭股、今浪大落後的中移（00941）、以及因為搞網上銀行連炒兩日的騰訊（00700）推番起，恒指尋日埋單升195點，收23,681點。

國指升唔夠1點，收報11,991點，事關炒咗個幾個月的內銀股，開始見升到滯滯哋要抖氣，內房股亦腳仔軟，未上車的似乎可以等撈底機會來臨。

AH股計落唔算平

一向對中資股口淡淡的美銀美林中國策略師David Cui出咗份報告，話依家AH股明平實貴，表面上，國企H股指數同滬綜指的往績市盈率，分別只係8.5倍及13.8倍。但唔少人都忽略咗，若果將預期盈利見頂、逐步受網絡金融競爭、以及利率市場化因素影響，估值超級低殘的內銀股剔除，兩個指數實際PE係13.1倍及22.7倍，後者較標普五百指數在○七年海嘯爆發前的高位仲要高，內地中小板及創業板的平均PE更高達37.8倍及57.6倍。

筆者認同佢嘅分析，但內地股市根本好難用客觀常理去分析，根本係政策市，資金流主宰一切，阿爺減息加埋變相降準，中央實行近年罕見的大規模托市，在下認為炒到爆之前，用客觀分析去平衡一下心態還可以，但用這理由放棄逐浪，實在有點浪費。

過去兩日勁升托住恒指的騰訊，旗下持三成股權的微眾銀行（Webank）去年中獲發民營銀行牌照，近排微眾銀行官網開始上線，街外估緊好快會有實質的業務運作，一眾內地傳統零售銀行要開始適應「騰訊銀行」的競爭之外，相信睇住消息最牙癢癢的，肯定係一直最想染指網上銀行生意的阿里巴巴話事人馬雲。

內地互聯網金融鼻祖，要數阿里巴巴的餘額寶，自從餘額寶用戶透過將少至一百幾十元人仔的結餘，撥去天弘基金作小額、高息（初期閒閒地有6至7厘）的投資之後，天弘基金管理資產規模於短短幾個月之內突破五千億元人仔，成為中國最大基金，傳統銀行為免存款流失，開始要用高息利誘存戶留低。

傳統銀行要迎戰

同天弘基金唔同，騰訊直頭有民營銀行牌照，意味業務唔單止貨幣基金，集腋成裘的「小會頭」咁簡單。從微眾由傳統金融機構四處獵頭的舉動，估計一開始微眾已具進軍個人客戶存款貸款生意之想法，其優勢是騰訊本身的QQ及微信，分別有八億及四億用戶群，一如當年阿里向淘寶用家戶口的餘額打主意一樣。

四大行一五年盈利規模大約萬億元人仔，微眾能在這個大餅之中可以分到多少，在營運之初去估是言之尚早。不過，對騰訊的估值唔多唔少都會有幫助。估計騰訊一五年29.3倍PE，只及阿里48.2倍的六成左右。而去年九月上市的阿里現價103.32美元，比招股價68美元高五成二，即使騰訊兩日挾高近一成，亦僅僅去到阿里上市時水平，咁睇法，似乎微眾的憧憬，應該仲有水位炒，嫌挾得急的，可以諗下分段入貨。