多間中小型發展商入標競投嘅沙田大埔公路─大圍段住宅地，昨日由宏安（01222）以7.73億元擊敗7家財團奪得，每方呎樓面地價約莫5,221元，算係符合市場預期。雖然呢幅地可以打造為洋房項目，但劉Sir知道，宏安講明幅地會起中小型單位，提供大約400伙，比起政府原先預計嘅大約180伙，明顯多出超過1.2倍，項目預計總投資額就大約16億元。

大圍住宅地發展項目預計總投資16億元。（資料圖片）

宏安地產黃耀雄稱，地皮會興建中小型單位。

大圍住宅地中標結果

地政總署噚日公布，中央投標委員會授權該署將呢幅大圍住宅地批畀出價最高嘅投標者，成交價7.73億元，中標財團係宏安。呢幅地皮總樓面約莫14.8萬方呎，劉Sir屈指一算，地皮成交樓面呎價約莫5,221元，係市場預期嘅範圍之內。

呢幅於早前就收到8份標書，入標財團以中小型發展商為主，包括嘉華（00173）、遠展（00035）及佳明（01271）等，另信置（00083）亦有參與競投，終由宏安成功投得。

方案進取 總投資16億

宏安地產黃耀雄同劉Sir講，啱啱投得嘅呢幅大圍住宅地，計劃打造成集團嘅「The Met.」系列，將會提供約莫400個住宅單位，戶型由開放式至兩房都會有，單位面積約200至400方呎左右，預計總投資額大約16億元。

劉Sir都知道，近排細單位頻頻做出新高價成交個案，令發展商傾向興建中小型單位。睇返之前規劃署文件，呢幅大圍住宅地初步預計提供約180伙，換言之，今次宏安就地皮嘅初步擬議發展方案，單位數目比起政府預期嘅大幅多出超過1.2倍。

去年落成量逾萬三伙

老友高緯環球張翹楚認為，發展商計劃喺呢幅可以作洋房發展嘅住宅地興建中小型單位，亦反映市場對上車盤有殷切需求，亦相信上車客對地皮附近有火葬場呢啲因素唔會太計較。佢估計呢幅地將來落成實用呎價約莫1.3萬至1.5萬元水平。

另外，據政府最新數字，截至去年十一月住宅落成量有13,142伙，按月多849伙，已達全年預測的17,614伙的約75%。