尋日康臣葯業（01681）逆市上升0.9%，收報6.09元，成功締造七連升，現價14日RSI（55）有上升動力，配合黃金交叉利好，短線回調若唔跌穿20日線5.7元，博佢踢上去年十一月高位6.81元。

康臣主打現代中成藥及醫用成像對比劑的研究、製造及營銷，擁有旗艦產品「尿毒清顆粒」同「釓噴酸葡胺注射液」，前者用於治療腎病，後者用於核磁共振成像。公司去年上半年營業額增長四成至3.2億元人仔，純利增逾五成至9,083萬元人仔，原因係佢持續開發產品市場及發展全國銷售網絡。

雖然康臣專攻腎藥，略嫌有啲單一，不過無礙盈利能力，而且佢亦持續投放研發，期內研發費用增長14.5%至546萬元人仔，而在研產品包括消化系統藥物。

睇番幅圖，股價由去年十月的一年高位7.37元，碌到落十二月的一年低位5.15元，極速唔見咗三成，近日已開始反彈，並逐漸淡化呢幾個月資金轉炒中資金融股嘅負面影響，後市可以多加關注。