以往資金緊，又想買樓做業主，通常會選擇居屋。不過，呢兩年居屋個價同私樓一樣咁癲，舊年就出現好幾宗700萬元以上嘅二手居屋成交。原來紅磡家維邨唔聲唔聲喺舊年十二月都錄到一宗做價高達711萬元嘅買賣登記，取代旺角富榮花園，成為九龍最高售價嘅居屋王。至於新界居屋踏入二○一五年都發力追，屯門翠寧花園啱啱有個三房戶以398萬元、實用呎價約6,723元雙破頂賣出。

紅磡家維邨有單位售711萬元，成為最新九龍居屋王。（資料圖片）

歷年高價二手居屋買賣登記

去年登記宗數較高居屋統計

中原黃良昇同劉Sir講，舊年市場合共有6,206宗二手居屋買賣登記（包括自由市場同第二市場），總值198.51億元，對比一三年嘅4,994宗及148.66億元，多咗24.3%及33.5%。

過400萬樓買賣增90%

雖然成交金額唔夠一○年嘅199.29億元咁高，但都係九六年有紀錄以嚟嘅次高。最近一手居屋申請反應熱烈，加埋今年政府會推出第二輪白居二名額，相信嚟緊二手居屋買賣會繼續上揚。

講番舊年，居屋成交價相當突出。歷年十大最高價居屋之中，佔咗6宗喺舊年嘅成交，港島同九龍都出現居屋王，一向成交唔多的家維邨，喺臨近年尾有個家安樓中層B室賣咗，成交價高達711萬元，成為最新嘅九龍居屋王。

至於鰂魚涌康山花園5座同9座分別有單位，以719萬同710萬元賣出，成為史上第一同第三高做價嘅居屋單位。

另一方面，居屋嘅入場門檻就愈嚟愈高，舊年價值150萬元嘅二手居屋買賣登記得番73宗，按年跌咗30.5%，反而價值400萬元以上嘅成交就有914宗，比前年多咗90.4%。

同期就有6個居屋登記量破百，最受歡迎係九龍灣麗晶花園，有152宗，而屯門兆康苑同火炭穗禾苑，就分別有143宗同129宗登記，排名第二、三位。

翠寧售398萬創指標

新界居屋雖然仲未可以躋身歷年十大，但最新做價都見到發力上升。

祥益地產胡志偉講，屯門翠寧花園啱啱錄到雙破頂成交，屋苑3座高層G室三房單位，以398萬元連補地價賣出。上址建築/實用面積約704/592方呎，建築/實用呎價約5,653/6,723元，喺屋苑嘅新指標。