踏入新一年樓市有新氣象，二手交投都慢慢轉旺。好似青衣區咁，受惠東涌新盤熱銷，呢排二手買賣快咗好多，就算交投一向都唔算活躍嘅盈翠半島，呢兩日連錄3宗成交，已經火速追平咗上個月全月數字。其實睇番土地註冊處資料，舊年全年整體樓宇買賣同金額超過8.1萬宗同5,400億元，比前年多咗15.6%及20%，睇嚟樓市辣招對市場嘅影響都慢慢淡化咗。

節日氣氛消散，近日二手市況更見活躍。(資料圖片)

青衣盈翠半島過去兩日連錄三宗成交。

整體樓宇買賣合約宗數

節日氣氛消散，二手買賣不單止重返正軌，市況更比早前有過之而無不及。好似青衣區呢兩日就錄得大約7至8宗二手成交，其中盈翠半島表現搶鏡。

中原陳輝麟同劉Sir講，盈翠半島呢兩日連錄3宗成交，已經等於上個月全個月嘅交投量，其中屋苑8座高層G及H室相連單位以1,313萬元賣出咗，以實用面積約1,038方呎計，實用呎價約莫12,649元。

至於將軍澳買賣都無受同區供應增加影響，美聯蕭銳賢話，將軍澳區今年頭五日錄得42宗二手成交，日出康城項目就佔咗15宗，包括領都3座左翼高層D室，成交價大約638萬元。

荃中高市價5%易手

該行羅敬業話，至於2期領峯7座左翼極高層D室，實用面積約719方呎，成交價約650萬元，實用呎價約9,040元，單位一一年到依家升咗逾三成。

該行梁仲維都同劉Sir講，荃灣有新居屋應市都無窒礙二手氣氛，好似荃灣中心喺過去嘅周末連錄5宗成交，按周多咗1.5倍，仲有唔少買家繼續用高價搶貨，屋苑5座高層E室賣咗333.8萬元，實用呎價大約10,302元，比起市價高咗5%左右。

舊年註冊量值齊升

劉Sir知道，舊年樓市交投感覺上好似好緩慢咁，但其實比起最受樓市辣招影響嘅二○一三年有明顯改善，睇番土地註冊處統計數字，舊年全年所有種類樓宇買賣註冊加埋有約81,489宗，涉及總值約5,474億元，按年分別升咗15.6%及20%。

而舊年住宅買賣就佔咗其中約63,807宗，比起一三年多咗約25.9%，涉及金額更加大幅增加約45%至約4,334億元。

另一方面，十大屋苑舊年表現都幾好。中原就話，期內十大屋苑有大約3,449宗買賣登記，總值約194.16億元，按年顯增加22.2%及31.2%，當中以天水圍嘉湖山莊累錄792宗最多。