今個禮拜有兩個項目備受市場關注，分別係港鐵（00066）天水圍輕鐵天榮站上蓋住宅項目同埋政府嘅葵涌健全街商貿地，兩項目會喺今個禮拜四同五截收意向書及標書。其中第三次推出嘅天榮站上蓋，將會再以變相「一口價」招標，每方呎補價金額估約1,500元起，相信唔少發展商都會遞交意向書，睇吓項目嘅招標條款，好似新地（00016）已表明會交意向書。

天水圍輕鐵天榮站上蓋項目再度推出，估計不少發展商會遞交意向書。（資料圖片）

葵涌健全街商貿地

新界兩地皮項目資料

天榮站上蓋住宅項目喺前年同舊年都有流標前科，前年嘅「死因」係補價過高，當時定下嘅補地價金額超過26.8億元，計番每方呎高達2,735元，最後「零標」而收番。

之後項目第二次推出就改咗玩法，以變相「一口價」形式招標，但收到嘅3份標書都達唔到港鐵要求，又再次流標。

政府喺上個月公布今季賣地計劃嗰陣，都講過有研究過收回天榮站項目做公營房屋發展嘅可行性，但同港鐵傾過都覺得未係時機。

再以一口價形式招標

項目最後喺上個禮拜第三度推出，劉Sir打聽到，今次會用番對上一次變相「一口價」嘅形式招標，包括地價同埋車站重置等費用，但其他條款細節就會有調整。

雖然呢個區有發展經驗嘅發展商唔多，但劉Sir都相信大部分發展商會入意向書，攞番張「入場券」先，所以預期反應唔會太差。而對上一次有份入標嘅新地，早前已講明會遞交項目發展意向書。

葵涌商貿地估值9億

老友高緯環球張翹楚話，舊年政府批出嘅天水圍第112及115區兩幅住宅地，每方呎樓面地價約莫1,800多元，今次呢個天榮站項目景觀遠較呢兩幅住宅地遜色，不過論位置就相對較好，佢估計要吸引財團入標，每方呎補價約1,500元會好啲。

至於葵涌健全街商貿地就會緊接喺禮拜五截標，項目提供約莫22.8萬方呎樓面，中原估計地皮每方呎樓面地價大約4,000元，折合估值約莫9.12億元，係目前市場嘅上限估價。

而該地皮市場估值最低就由約7.3億元起，即係樓面呎價大概3,200元。