今年政府安排截標嘅地全數賣晒，之不過話都無咁快，緊接今個禮拜五（二○一五年一月二日）就有出年首幅地皮截標。呢幅沙田大埔公路－大圍段地皮，可作中低密度住宅發展。但有測量師老友就覺得，雖然近排市場投地取態幾積極，但可惜地皮附近有火葬場，話對地價無影響就假，地皮市場估值最低約莫4.89億元。

沙田大埔公路－大圍段地皮本周五截標，地盤面積約7.05萬方呎。（資料圖片）

高緯環球張翹楚預料，發展商出價偏保守。（資料圖片）

沙田住宅地皮資料

呢幅位於沙田大埔公路－大圍段嘅地皮為出年密密麻麻嘅土地截標，展開了序幕。

可建180住宅

該地皮面積約莫7.05萬方呎，總樓面就大概14.8萬方呎，預計可以提供大約180個住宅單位，而項目亦規定要提供約14個公眾停車位。

劉Sir知道，今年大圍區內就先後批咗兩個發展項目，最矚目就梗係新世界發展（00017）喺十月投得嘅港鐵（00066）大圍站上蓋大型住宅發展，項目提供多達2,900個單位，但發展規模同今個禮拜截標嘅沙田大埔公路－大圍段地皮差異太大，好難直接比較到。

不過，另一幅喺今年批出嘅同區地皮性質上較接近，參考價值較高。呢幅大圍美田路住宅地喺今年四月由遠展（00035）動用約1.48億元投得，計番樓面呎價約莫2,817元。

雖然，近排發展商頻頻以進取價投地，而且仲有唔少新界地皮以高價批出，但係劉Sir老友高緯環球張翹楚對地皮就話有保留。

佢覺得近排市況係唔錯，但呢幅地皮有個致命傷，就係位置唔好，附近有個火葬場，所以發展商出價未必會好勇，佢預期地皮估值大約5.2億元。

呎價料約3300

至於市場嘅估值下限就大約4.89億元，樓面呎價約3,300元。

不過，都有測量師對地皮做價睇得幾樂觀，中原黎堅輝話，地皮位置接近洋房項目戈林，佢估計地皮樓面呎價大約6,000元左右。計番估值約8.89億元，係市場暫時估得最高。

但黎堅輝都提醒，要留意該幅地皮位置貼近斜坡，發展商要承擔斜坡維修保養，可能會增加建築成本。