周一港股成交過千億元,到尋日眼見唔少缸邊友經已出埠外遊去也,主板成交縮減至僅780億元。在滬綜指急挫逾3%之下,恒指只跌74點收市,報23,333點。整個場冇乜亮點,係隻創業板股喜尚(08179)比較矚目,上晝股價創完五十二周新高1.63元,下晝就改玩苯豬跳急插八成,埋單得番0.455元。今日平安夜得半日市,相信魚缸交投都會靜,即使未收爐都係選擇唔做唔錯居多!

近期鐵路基建股累積不少升幅,現水平值博率已大減。(資料圖片)

佳兆業(01638)證實多個內地項目被鎖定,影響現金流,加上大行發報告踩多一腳,尋日股價再挫12%,收報1.53元,短短十二個交易日股價累跌五成,市值得番78億元。至於首日掛牌的萬達商業(03699)股價亦失守招股價,畢竟現成有咁多財務狀況更好的內房股可供選擇,睇怕呢隻新股都要捱番一段日子,等板塊回暖先有機會發圍。

資源板塊無運行

國際金價再下跌,短線現貨金價會再下試上月低位。黃金ETF及金礦股發軟蹄,SPDA金ETF(02840)跌1.7%、中國黃金(02099)及招金礦業(01818)分別跌6.5%及3.5%,同創五十二周新低、紫金礦業(02899)跌2.7%,暫時未係撈貨時候。

鋼鐵股亦見回吐,馬鋼(00323)、重鋼(01053)及鞍鋼(00347)均低收作結,跌幅2至3%。如果要博,也許落後水泥股更值博,尋日就見亞洲水泥(00743)及山水水泥(00691)分別逆市升2%及3%,可以望多兩眼。

在憧憬內地將持續投放資源啟動鐵路基建,加上「一帶一路」策略打開內地鐵路產品出口市場,故近期鐵路基建股累積不少升幅。

中交建(01800)由十月低位5.45元,升至前日高位見10元,阿莊經已聽到唔少散戶慨嘆呢隻股終於見番花蟹價(10元),事關唔少散戶在八、九年前高位投資相關ELN,結果十幾廿蚊接貨坐到依家都仲未鬆綁。

正正由於短線累升幅度甚巨,長假前見到獲利沽盤湧現。中鐵建(01186)及中鐵(00390)同跌逾半成,中交建算係跌得少,僅跌0.3%。查實呢類鐵路基建股,雖然話主要係接政府項目,但應收帳款數期長,且一般只會係合理利潤,唔會有好多利錢;至於海外項目,所謂「高鐵外交」對象都係南亞國家,政治同違約風險不容忽視,都唔係想像中咁好景。股價大升過後,現水平值博率已大減,若然冇平貨在手,係咪仲值得追入,值得深思。