今年樓價繼續飆升，租金全年表現都唔輸蝕。睇番地產代理促成嘅租務個案，第四季由於係傳統租務淡季，所以十一月份租金升幅收窄番啲，只得0.4%，但以建築面積計，平均呎租25.2元，仍然做出連續六個月創新高紀錄。而今年頭十一個月，租金累積升咗9.6%，紅磡黃埔花園更加升咗16.9%，平均呎租逼近30元。

十大藍籌屋苑平均租金統計

中原黃良昇同劉Sir講，據佢哋公司新簽嘅租約統計，十一月份全港100個大型私人屋苑平均建築呎租升到去25.2元，呎租連續升咗七個月，累積上升11.5%。若相比舊年十二月平均呎租23元，計落今年頭十一個月租金累升9.6%。

海怡落後 僅升3.8%

睇番十大屋苑，首十一個月有七個屋苑呎租升幅有一成以上，黃埔花園就最標青，升咗16.9%，依家平均呎租去到29.7元，而鰂魚涌太古城都升咗16.1%，平均呎租約34.6元，而第三位係藍田麗港城，呎租累升15.1%，去到24.4元。表現最差係鴨脷洲海怡半島，今年呎租只係微升3.8%，平均呎租約24.4元。

美聯劉嘉輝話，今年租金繼續升，攪到月租1萬元或以下嘅租務成交比例不斷減少，今年跌到得番14.6%，同舊年再低2.4個百分點，而○三年呢類細價租務比例曾經高達71.6%。

代理繼續睇好明年樓價走勢，香港置業李志成預計，明年樓價升幅可以維持5%以內，中小型單位更加有機會出現七連升情況。而今年樓價暫時升咗約9%，一啲同區有新盤推出嘅二手屋苑，樓價升幅唔錯，好似荃灣區嘅荃灣中心、綠楊新邨同愉景新城，今年樓價都升咗約18%。

二手市佔74% 料續縮

該公司姚偉南話，今年一手住宅佔買賣比例升咗約6個百分點，去到25.4%；相反二手佔比例就跌到約74.6%，比例係十年新低。

姚氏相信，明年新盤定價唔會好似今年咁保守，估計一、二手溢價約莫有5至8%，而明年一手住宅佔市場成交比例，有機會創十一年新高。