內地股市持續向上，港股亦繼續收復失地，昨日恒指一度高見23,478點，雖然埋單仍升291點報23,408點，主板成交突破一千億元，不過全日仍有726隻股票股價下跌，上升的則有615隻。

蒙牛若能開展更多元化的業務，有助提升品牌價值。（資料圖片）

尋日市況特色係弱勢藍籌發威，蒙牛乳業（02319）成升幅最大藍籌，升7%、其次是中國神華（01088），升5%，昆侖能源（00135）升3.9%。此外，「三桶油」亦隨油價反彈而做好。唔排除時近年結，除咗當炒藍籌繼續偏強外，基金盤亦會推番高些少啲弱勢藍籌，等份成績表好睇番些少！

內地券商不斷唱好A股，一來金魚缸交投增加有利佣金收入，二來券商股股價飆升，亦可乘勢在高位配股集資，增大資本搶佔市場份額。最近海通證券（06837）便宣布配股集資299億元。雖然有外資券商報告話，海證抽水行動來得較預期早，但阿莊就認為，咁大規模集資，預番啲水位畀接貨者亦應該。

炒阿里影業要膽大

阿里影業（01060）昨復牌，開市前時段成交價1.39元，亦係全日最低價，首半個鐘已見全日高位1.78元，真係稍有猶豫都唔使諗，敢落場追貨眨眼就可以食胡。之後隻股在1.6至1.7元水平上上落落，尾市在獲利沽盤湧現下回落至1.56元收市，跌3%。不過，聽啲表叔話，呢隻股仲會有其他搞作，但跟炒真係要有豹子膽，因為波幅大兼升跌快，自問行動慢啲都係齋睇好了。

講番尋日藍籌之冠蒙牛，上周股價一度低見27元，即係去番舊年中的水平。不過，今年二月時曾以42.5元配股，嗰時上車揸到依家的，真係睇到心到實。雖然見低位後終於觸發反彈，尋日再升7%，收報30.95元，但剛觸及50日線便掉頭，若短線升未能再向上收復失地，相信會在低位整固一段時間，才能再上試阻力位。

其實，自泊得中糧呢個大碼頭，蒙牛的控股股東背景實力已大大增強，加上與外資同業進行戰略合作，整合後的競爭力已有所提升，絕對是實力之選。之不過，若然仍只局限於乳品業務，估值難有大突破，反而，藉着系內的銷售網絡及完善的產業鏈，有能力開展更多元化的業務，如覆蓋個人健康及營養品業務，有助分散業務風險，亦可藉此提升品牌價值。

蒙牛現價相等於一五年度預測市盈率約20倍，估值開始重現吸引力，只是現時資金集中主攻內地金融類股份，故價值型投資者落注，要有心理準備要作中線持有。以預測市盈率18至23倍計，料未來六個月股價波幅介乎27至35元水平。