Fundman睇市：李寧不宜有期望

外圍強到咁，加埋滬綜指升到3,108點創超過四年新高，港股繼續擺出一副愛理不理的姿態，唔單只去唔到九月高位25,362點，就連十一月的24,313點的四頂阻力都未見，睇走勢要上番去都唔容易。上周恒指V形反彈，周五升284點，收23,116點，全周計仲要跌133點。

聖誕假期臨近，十二月剩低幾個交易日就要講拜拜。今年個市悶到暈，滬港通雷聲大雨點小之外，最意想不到的，是九月開始資金瘋狂由增長類股份中提款，水務、燃氣、新能源及汽車股統統跌個四腳朝天，資金換入中資金融類股份，包括券商、內銀及內險。

史提芬都看好內銀，其實自中行（03988）發優先股的市場反應遠超出預期，配合人行意想不到地突然提早減息後，無論A與H股市場，資金都一面倒追入估值低、市值大的中資金融類股。

增長股漸見吸引

至於增長股的估值，其實由九月前的稍嫌偏高，到近日開始已見吸引。不過，中期調整結束的關鍵，仲係市場對中資金融股的追逐幾時完結。

由客觀環境睇，中國逐步推行利率市場化，網上金融等理財產品的出現，對銀行營運的挑戰逐漸浮現，加上資產質素見頂進入轉壞的周期，都對銀行甚至保險股不利，惟一是內銀5至6倍PE，歷史低位的估值，加埋市場逐漸對中央政府的經濟改革信心增強，可見短期內，中資金融股未必可以由鐘擺的一端（極超賣）走到另一端（極超買），但明年第一季開始，逐步回歸到一個中性的投資基調，機會性仲係存在。

小股東逃生無門

要數中國成功轉型的體壇戰將，李寧都算是最傳奇的一位，由「體操王子」成為今日的財技高手。從去年初以怪招發可換股證券向股東伸手之後，李寧（02331）又有新搞作，以每股2.6元，折讓兩成作十二股供五，今次抽水發行「發售證券」及「可換股證券」，前者因為無「威士」（供股權）交易，小股東不供白不供，無錢跟主要股東show hand，只會眼白白睇住權益被攤薄，包銷商一句多謝都無。至於後者，發可換股證券，無非係畀非凡中國（08032）可以維持在李寧的話事權，又唔怕踩界，持股超過三成，要被迫對小股東提全面收購的財技安排。

兩年前，私募基金TPG入股時，李寧找來改革核心人物金珍君出任行政總裁，豪言三至五年內「渠道復興計劃」就會見到成績，主要協助經銷商處理庫存、回購及整合銷售渠道。結果經過兩年時間，李寧今年上半年虧損又再擴大，去到5.86億元人仔，比一三年全年蝕3.92億元人仔更多，金珍君唔等三月成績表出籠，十一月率先退下火線，券商估李寧的市場份額，由金氏上任時的14%跌至4%。

競爭對手之一安踏（02020），同樣經歷內地運動用品品牌整合的大潮流，不過，股價今年已返到一○年家鄉，反觀李寧，財技較核心運動產品經營出色得多，今日股價只及一○年高位十分之一，公司又一次向股東要錢，進行渠道復興計劃第二階段。由於無法賣出供股權減低損失，小股東基本上是焗住要供，惟有希望供股完成後一年半載（一三年的經驗係咁），股價有技術性反彈，輸少當贏。但經過這兩輪的抽水，李寧相信已經嚇怕一眾機構投資者，可以當睇少一隻。