港股上周五承接美股升勢持續做好，恒指再升284點，收市報23,116點，國企指數收市升69點，報11,400點，全日主板成交金額957億元。騰訊（00700）繼續成為大市上升主要動力，上升3.4%，友邦保險（01299）及滙控（00005）分別升3.4%及1.7%。內地股市臨尾市才發力，滬綜指在銀行、煤炭、鋼鐵及電力股做好帶動下，重上3,100點關口，最高更升過上3,117點，創四十九個月以來新高，最後收市升51點報3,108點。

北京發展一二年開始轉型至環保能源業務，前景看俏。（資料圖片）

內地股市與港股近日出現同一現象，就係升市中股票跌多過升，周五上海A股升的股票數目334隻，跌的有592隻，深圳股市仲誇張，升的只有280家，跌的接近1,800家，似乎唔少股民一啲都分享唔到升市的喜悅。至於禮拜五港股升近三百點，但主板升跌比例只係一半半，而上升的股票，除咗指數成分股同埋近日熱炒的基建板塊之外，其他都係近日急跌過後而作出技術反彈。

三四線股不宜沾手

以目前形勢來看，大市走勢依然麻麻，好多股份尤其係啲三四線股，仍然好似要錢唔要貨，即使有好消息公布，都變成趁好消息出貨藉口，由於股價低處未算低，撈底隨時坐艇，所以阿莊覺得喺三四線股氣氛未好轉之前，都係不宜沾手為妙。

比亞迪（01211）經過上周四急挫後，上周五顯著反彈14%，以28.6元收市，較周四低位18.7元足足反彈10元有多，如果夠膽撈底真係賺到笑，但係周四插成咁，又唔知發生咩事，阿莊真係無膽玩，唯有替買咗的「勇者」高興。

事實上，呢排除咗細價股插到飛起之外，好多有實力的股份都反覆下跌。阿莊覺得細價股炒作好講氣氛，現階段嚟睇有排都未成氣候，反而一啲有實力股份，如果大市氣氛回暖，相信會率先反彈，故可以吼返啲質素有番咁上下的二三線股如北京發展（00154）。

公司股價九月開始由3.43元反覆回落，月初仲一度跌穿埋2元，但喺2元關口水平開始見到承接，上周五更隨大市反彈6.34%，以2.18元收市。 集團自一二年開始轉型至環保能源業務，並主攻再生能源發電廠項目，九月期間集團與綠海能成立特許經營公司，以投資、建設及經營海澱區再生能源發電項目，估計項目日處埋垃圾量達2,500噸，料於明年二月及五月進行試行及商業營運。

自轉型後公司發展積極，加上集團母公司為北京控股（00392），相信有助其拓展及併購，前景看俏，近日股價回落至2元附近水平，估值明顯變得吸引，不妨吼低吸納。