今個星期五有塊大嶼山長沙住宅地皮截標，由於呢幅地皮可以用嚟建低密度洋房，加上規模唔算太大，所以預計市場會有一定捧場客。劉Sir估計，喺區內有發展項目嘅太古地產（01972）同信置（00083），相信入標呼聲比較高，而依家幅地嘅市場估值約4.71億至5.44億元。

於本周五截標的大嶼山長沙住宅地，最高估值約5.44億元。

理想城市張聖典認為，大嶼山長沙住宅地規模較去年批出的同區屋地大。（資料圖片）

大嶼山長沙住宅地資料

今次呢幅大嶼山長沙住宅地，係政府近年主動推地以來，第4幅推出嘅長沙地，幅地面積約4.53萬方呎，以地積比率0.8倍計，約莫提供3.63萬方呎樓面，預計可起10多至20多幢洋房。

睇番顯示，政府喺一○年開始主動推地以嚟，原來先後已經批咗3幅大嶼山長沙地皮，全數畀香港太古集團及旗下公司擸晒，不過每方呎樓面地價差幅上落接近1萬元之多。

好似最近一次係去年七月批出嘅大嶼山長沙嶼南道屋地，由香港太古集團以9,350萬元投嚟自用，每方呎樓面地價1.51萬元，創咗全島最貴。

長沙項目明年開售

而旗下太古地產喺二○一一年十二月就用1.768億同1.8億元，一口氣買入大嶼山長沙406及407號地盤，每方呎樓面地價約5,541及5,537元。

不過，原來早喺○七年，信置已經好識貨，透過拍賣投得一幅大嶼山長沙地皮，即係依家新起嘅Botanica Bay，當時成交每方呎樓面地價約6,749元。

而呢個項目嘅樓書最近已經上網，成個項目有16幢洋房，示範單位已經可以預約參觀。發展商預期明年初就可以開售，會係集團明年嘅頭炮項目。

市場預計，太古地產及信置本周五有機會再次入標今次呢幅長沙地皮。

每呎樓面價料萬五

理想城市企業估值部主管張聖典就認為，即將截標嘅大嶼山長沙住宅地，規模相比去年批出嘅同區屋地較大，而且位置上相對輸蝕咗啲，相信地價未必可以再闖高峰。

張氏預計，大嶼山長沙住宅地每方呎樓面地價約1.3萬元，折合估值約4.71億元，係市場下限水平，而地皮最高估值約5.44億元，每方呎樓面地價約1.5萬元。