石油輸出國組織（OPEC）調低了一五年全球原油需求預估，科威特為亞洲客戶提供產出折扣價，兩單消息加埋，國際油價雪上加霜。前晚，紐約期油再插2美元至61.2美元一桶，再創五年新低，油價到底見底未？前晚伊朗總統以不義去形容油市，暗串親美的沙特懶理其他成員的減產要求，伊朗石油部官員估計，一旦油組爆發減價戰，每桶油價可能插去到40至50美元，難怪街外睇油價跌落50至60美元的人，近期愈來愈多。

國際油價再創近年新低，航空股繼續借勢炒上。（資料圖片）

太陽日誌

中國十一月通脹數據跌到1.4%，通縮魔爪來犯已漸見端倪，依家走入銀行做人民幣定存，息口閒閒哋3至4厘，一個月上海同業拆息，亦見從十月低位3.8厘彈返上近4.5厘，內地實際利率（資金成本減通脹）逼近○九年以來的高位，配合埋油價大插水，進口大宗商品價格下跌（十一月進口負增長），大行估人行明年有兩次減息機會，睇落可能仲係保守咗啲。人民幣匯價十月高見過6.1083（執筆時是6.1889），隨着美國貨幣政策回到中性甚至逐漸趨緊，中國卻朝相反方向走，人民幣可能已經見咗中短期頂位。

美股走勢更趨波動

事實上，上星期美國公布十一月就業數據爆晒燈，非農職位增長遠勝預期，依家利率期貨顯示，美國明年六、七月將開始加息，下星期二、三聯儲局會議，會唔會將一段長時間維持低息的承諾從聲明中剔除，睇嚟可能性唔細。

睇番上一次十月會議，美股就係驚耶倫改聲明，道指由17,350點插到落15,885點，最後無事先炒到上17,991點的歷史新高，但已經令唔少美股好友飽食驚風散，未來幾日段估美股仲會相當波動。

港股尋日即市跌穿過十一月中低位23,252點，去到23,169點，收市又死唔晒，跌211點，收報23,312點。經過八日過千億成交之後，尋日主板成交縮番落980億元，全日超過950隻股票向下，無論指數股與二三線，都跌得幾全面。

創維或有動作跟尾

電視股創維（00751）計劃發可換股債券，集資唔少於13億元，初步兌換價5元，較停牌前4.2元高出19.05%。大股東承諾包銷，吸引小弟留意消息，一來中期業績佢手頭現金減負債應該仲有廿多億元，更重要係，佢二千年上市以來一直都無伸過手同街外股東要過錢，而批股供股都未試過。

創維突然轉性發可換股債券，通告話集資係為咗重組公司物流業務，以及開發新業務如冷氣機業務，睇嚟小股東要密切留意，公司係咪有大動作跟尾。

油價插水，三桶油及油服股一彈就散已經預咗，航空股繼續借低油價故仔炒到飛天，昨日東航（00670）破頂，收市升8.5%，報4.05元，國航（00753）升5.3%，收報6.49元，南航（01055）則升4.3%，收報3.86元。如果之前無跟買東航，想搵隻慢火煎魚，查實國泰（00293）依家市帳率先1.1倍，仲係平，可以諗諗。

個市唔就，資金湧晒落去無乜蟹貨的新股身上，中廣核電力（01816）昨日升9.3%，收報3.62元，消息話有唔少國際配售時向隅的傳統基金買盤、以及睇死中廣核電會好快入到MSCI的指數基金搶貨。在下唔打算阻大家發達，但其現價已經較IPO價累積升三成，22倍PE，投資吸引力已經麻麻哋，有貨想賺到盡，或者等埋入指數，就點都要諗諗幫佢計數。