馬鞍山白石耀沙路住宅地前日以新高價批出，區內放盤業主梗係借勢起哄啦。代理老友同劉Sir講，馬鞍山區有大約5%放盤業主都封咗盤，亦有個別業主即時調高叫價，好似新港城一個兩房放盤，賣地後就反價咗10萬元，依家以440萬元放售。而恒地（00012）亦唔執輸，昨日即時將同區迎海第一至三期共143伙停售，其中第三期迎海．星灣御約77個單位更隨即加價約2%。

高價賣地後二手市業主心雄，馬鞍山更出現封盤和反價的情況。（資料圖片）

馬鞍山高價賣地後市況

受同區土地高價批出嘅利好消息帶動，區內放盤業主開始嚟料，封盤有、反價亦有。

劉Sir老友美聯徐永成話，馬鞍山區有大約5%業主封盤，部分就立即加價放售，好似新港城P座低層3室，實用面積337方呎，原先叫價430萬元，但當業主收到區內地皮高價賣出嘅消息後，立即反價10萬元，最新放售價係440萬元。

利嘉閣楊震霆都話，同區聽濤雅苑7座低層B室喺賣地當日就反價咗2萬元，以552萬元易手，實用呎價約莫10,494元，高市價大約5%；同屋苑8座高層A室三房戶本來叫價630萬元，但依家封咗盤。

迎海突煞停 料等提價

有發展商為免區內新盤賣平咗，決定重整部署，好似鄰近地皮嘅迎海項目銷售即時叫停。

恒地林達民同劉Sir講，同區地皮以高價批出係催化劑，面對建築費、樓書等成本上升，用今時今日嘅地價計，都差唔多等於旗下迎海項目嘅銷售價，所以價格有上調空間，其中，第一至三期發售單位噚日即時暫停銷售，而第三期迎海．星灣御亦都加價同埋削優惠，第一、二期亦會部署加價。

據一手住宅物業銷售資訊網，發展商噚日暫停銷售迎海第一至三期共143伙，其中第三期迎海．星灣御約77伙加價約2%，並取消最高樓價3%「提前付清樓價優惠」，從價印花稅津貼由樓價6%減至3%，呢77伙將會喺下周一攞番出嚟。

通車帶挈 寶翠創指標

西區近期亦係另一個受利好消息帶動嘅區域。呢區二手市況最近被港鐵西港島線今年底通車嘅消息炒起咗。

中原謝家哲話，寶翠園3座高層D室，實用面積670方呎，連租約以1,358萬元成交，實用呎價約20,269元，無論售價抑或呎價都創咗屋苑兩房新高紀錄。