Fundman睇市：新奧能源博反彈

尋日中廣核電（01816）首日掛牌，遇啱前日大跌市，暗盤所見都無出面街傳到三成五開外咁誇張，尋日以3.45元開出，最後收3.31元，較招股價2.78元，升0.53元或19%，以全日高低位3.48及3.28元，貼住後者收，都算有少少反高潮。

睇返尋日最集中成交在開市一刻的「U盤價」3.45元，全日拉勻平均成交價3.37元，即係話即日鮮收市投降的，應該係輸多贏少，無他嘅，雖然話基金配售打崩頭，不過睇IPO認購2.2億股的102張頂頭槌飛，分配率有0.6%或者132.3萬股，老實講，係比預期多，以厘半孖展，頭槌飛都係講緊2.91元左右成本，執硬之下，U出街有一成九回報，試問大飛客點會唔心動？

尋日整體大市上升股份984隻，升跌股份比例是64對36，係過去一個月以來最高，似乎過去兩星期，中港股民所謂的「滿倉踏空」（在指數上升下，揸到成手貨仲要輸錢），形勢開始逆轉，如果內銀、內險及券商真係需要抖抖氣，其他早排無端端被質的優質股，可優先考慮撈底。

醫藥股睇高一線

醫藥股係尋日的非金融股報復式反彈中，升得最勁，皆因市傳《互聯網食品藥品經營監督管理辦法》，可能在明年初頒布，意味醫藥有可能發展到電子商貿市場。老實講，乜藥可以放上網賣，乜藥唔得，在下唔係專家，唯獨係基金如果要乾坤大挪移，在金融股食胡，買返醫藥股，理論上會搵市值大、交投量足夠、容易買齊貨的行先。尋日四環（00460）、石藥（01093）及中國生物製藥（01177），升幅介乎4.5至8.6%，成交唔少，應該可以睇高一線。

三隻之中，四環今浪都真係跌得唔少，由十月中6.68元，殺到落去星期二見4.78元，幾乎跌近三成，本身無病無痛，純粹因為基金掟增長股換大落後金融股所累，以一五、一六年預期增長23%，一五年預期市盈率20.3倍，尚算吸引。昨日一彈沽空飆升至千六萬股，股數計係三個月新高，會唔會挾到淡友好難講，以股論股，現價5.27元，短期升返一至一成五，唔算奢望。

新能源蒙上陰影

宏觀睇，早排中東石油輸出組織決定唔減產，同美國的頁岩油氣商攬住死，大家累鬥累搞到環球油價跌到五年新低之後，石油、煤炭等能源股，暫時都唔使諗住，在下甚至懷疑，一旦油價如最悲觀的預測，直插去40美元一桶水平，屆時可再生能源的商業價值，各國政府包括中國，鼓勵發展的積極程度都可能打上折扣，比亞迪（01211）彈都唔彈的走勢，可以見到一二。

內地管道燃氣發展，在中俄簽訂長年期供氣協議、而內地城市管道建設首階段到位下，衰啲講已經洗濕咗個頭，焗住要推，如果博反彈，新奧能源（02688）應該可以首先留意，早排因為向大股東買資產，股價偷步跌咗落嚟，現價回到大股東增持的46.1至49.9元範圍中下限水平，諗得過。