零售街舖受壓，市場普遍睇好明年商場舖走勢，昨日新地代理租務部總經理鍾秀蓮同劉Sir講，新地（00016）喺葵涌嘅九龍貿易中心飲食零售樓層正式開幕，並命名為「悅@KCC」，料年租金收入有約2,298萬元。若連埋喺附近即將動工嘅活化工廈「活@KCC」，兩個商場將合共提供138個舖位，總面積約莫16.5萬方呎，年租金收入料可高達6,300萬元。

新地代理鍾秀蓮(左)稱，葵涌悅@KCC及活@KCC的全年租金收入合共可達6300萬元。

信和地產陳欽玲(左)指奧海城人流大增。

新地旗下「悅@KCC」商場資料

鍾秀蓮同劉Sir講，悅@KCC樓高三層，面積約莫6.5萬方呎，提供近百個車位，目前有28間商舖，已經全數租出，呎租介乎50至65元，商場租金較九龍灣及觀塘同類型嘅商場仲要高，預計年度租金總額有約2,298萬元，而商戶主要係餐飲業，佔約七成。

活@KCC總投資五億

佢又話，如果悅@KCC加埋附近旗下嘅活@KCC，商戶數目就共有138間，預計全年租金可以去到6,300萬元。

活@KCC前身係聯泰工業大廈，鍾氏話其實而家已經向有關當局入則，下年第一季就可以動工，料一六年第三季落成，會用嚟做銀座式商廈，總投資額逾5億元，呎租就介乎40至120元。另外，集團旗下新蒲崗爵祿街及將軍澳南兩個大型商場項目預計都會係一六年尾推出。

劉Sir噚日亦去咗另一個市區商場項目記招。信和地產租務部總經理陳欽玲話，信置（00083）奧運站奧海城做咗優化工程，今年營業額有機會達24億元，按年增10%，人流亦升12%，將創歷年新高，平日人流有34萬人次。

奧海城優化生意新高

她稱，商場做咗優化，今年推廣費用咗約4,000萬元，舉辦咗超過1,000場推廣活動。佢又話，預計十一及十二月商場營業額錄約4.6億元，按年升15%，亦都創咗新高，而家商場呎租約50至200元。

忠誠拍賣拍賣昨以一口價249萬元售出葵涌金龍工業中心4座中層C室法院令事故無契單位。黃開基拍賣行以420萬元拍出長洲地段508號連上蓋物業，高開價6.3%。

車位為近排投資焦點。資深投資者林子峰話，居民對拆售筲箕灣東熹苑車位有啲意見，但相信唔影響銷售步伐。而中原黃東雄話，呢個車場拆售項目已收咗逾200票。另消息稱，中環國際金融中心二期中層一個單位，以呎租155元租出。