揀股過聖誕飛起滙豐

市場先生：南洋建生悶到發

究竟「聖誕鐘，買滙豐」是否已不合時宜？滙控擁躉兼散戶Blog王市場先生表示：「以前『聖誕鐘買滙豐』Work，係因為佢喺第二年二月份就會公布全年業績，以前業績多數唔錯，而且末期息又好，如果有增加派息嘅消息都會喺二月公布埋，所以股價咪會升。

不過，現時國際金融機構嘅生意喺愈來愈多監管條例之下好難做，呢啲條例好多時係想達到政治目的，好似打擊恐怖分子咁，依家嘅罰款係罰以前嘅事，根本冇辦法補救！」

跨國銀行風光不再

他續稱，「國際金融機構為免將來被罰，逼住加Compliance（法規）部門人手，支出根本冇得慳，滙控盈利喺美國加息前難有好表現，上季有增長主因貸款減值撥備減少，所以相信佢股價冇乜上升動力，現價70幾蚊買入只可以寄望收息，『財息兼收』嘅日子已經過去。」

近年「悶股」已取代滙控在他心目中的地位，他早以七位數字金額建立新價值組合，目前組合部分資金投放於南洋集團（00212）及建生國際（00224）等股份。他稱，雖然此等股份冷門，惟勝在回報保持平穩增長，主因其走勢與大市關連度低，反而較受公司經營狀況影響。

市場先生又指，南洋集團可算是悶股的極品，由十年前7.2元穩步升至目前49.35元，升值逾5.8倍，集團業務簡單，主力投資物業，股東可安心長揸等增值。另外，建生國際主力收購物業作投資收租，近期更活化旗下工廈建生大廈為寫字樓，租金收入有望提升，周二股價曾爆升四成。

中原資產：友邦領匯啱長揸

不少散戶仍對滙控情有獨鍾，更長年持有，中原資產管理高級副總裁黃安盈表示：「以我估計，同滙控Keep住愛情長跑嘅會有兩大類人，第一類就係好後生就買落貨長揸收息嘅中年人士，另一類就係喺高位買落，被綁死之後揸住唔放嘅投資者，呢個情況唔係同滙控談戀愛啊，分明係孽緣！」

她認為，若果目前希望揀選有望穩定增長的大藍籌，滙控並非首選。雖然市場憧憬美國即將加息，預期有利其利息收入，催旺資金追逐，但若要談得上是質優的美國加息概念股，便非友邦保險（01299）莫屬，除了利息收入有機會受惠之外，現時該公司力爭攻佔內地市場，其國際品牌有助吸客，支持保單收入健康增長，適合長揸，絕對可以挑戰滙控於股壇的地位。

此外，她亦推介其他長揸的質優股。「我不嬲都推介長揸中電（00002），用嚟對沖吓電費增長都好吖！而染藍日子尚短嘅領匯（00823）都值得諗，佢近年優化旗下商場，有助促進盈收。」

進取型可吼A股ETF

在投資此類股份時，若未能長時間監察市況，大可選擇月供，惟她建議將買貨日訂於每月月頭，可以幫手儲錢，避免做「月光族」；但平日若有留意股市，則可「吼住」跌市或者市場出現恐慌時便買入一、兩手。

滬港通通車後，不少股友希望賺「北水」。黃安盈稱，「A股有由熊市轉向牛市嘅訊號，其實如果無留意特定A股，進取啲嘅投資者可考慮投資A股ETF（交易所買賣基金），長揸幾年都得，南方A50（02822）算係首選！」