早年A股多次令人表錯情以為佢轉勢，但郁嚟郁去都係喺1,900至2,200點徘徊，卒之依家用行動話畀大家知，如何用四個月狂升八百點！A股大翻身，過去跟住霉足咁耐的券商股一定有着數，好似今年推介過嘅中州證券（01375）、中國銀河（06881）同第一上海（00227），尋日升幅13至25%不等，另要數最癲的是申銀萬國（00218），尋日即市最多狂飆六成，接近掂到8蚊關，埋單仍升39.3%，收報6.84元，一步到位！

申銀萬國中期多賺三成至2,923萬元，原因係經紀業務、融資及貸款業務、投資銀行業務收入增長較大，分別增加8%、35%及1.3倍，期內擔任鴻福堂（01446）IPO主承銷商。公司上月底宣布二供一（每股供股價2.342元），雖然折讓高逾五成，不過股價反應淡定，而且近日有指其母公司同宏源證券（000562.SZ）合併事項終於塵埃落定，股價維持在保力加通道（4.19至5.38元）內，直到尋日先至強勢突破。考慮到尋日升勢幾急，如果短線回吐仲守得住尋日平均價6.1元的話，小注博佢可以再破頂。