A股開始見到85度角的飆升，9日RSI去到95.1的超買水平，最後會唔會樂極生悲，以尖頂急抽直落散場？基於內地股市近八成交投來自散戶，他們極端的投資取態肯定會令市況極為波動。

恒指期貨走勢

話港股愈來愈A股化一點都不過分，單睇過去幾日，陰陽燭圖上梅花間竹的走勢，唔少炒家頭都大。恒指周三後抽，即市高見23,921點，完全回補星期一的下跌裂口後低收，如果以為完成後抽，睇勢追沽，又被個市殺到一頸血，昨日恒指升403點，收報23,832點。

其實，本周四日以來恒指都離不開23,293至23,921點區間，安全起見，筆者堅持上破24,313點或跌穿23,252點頸線，先判定後市點行都唔遲。反而因為A股狂升，大國企追升下，國指昨突破九月初高位，收11,481點，反之恒指距離25,362點足足有1,530點之多。

值得留意是沽空比例持續高企，昨日雖回落至13.96%，依然高於近半年9至11%平均區間，反映基金並唔認同內地散戶的睇法，最後誰勝誰負，應快有答案。今晚美國公布就業數據，加埋炒周末人行降準，無謂博，指數破上述橫行區前，筆者決定繼續做花生友。