滬綜指昨日單日勁升4.3%或者119點，收2,899點，咁升法，3,000關口應該係指日可待。毫無疑問，近排內地股民殺紅了眼，只着眼人民銀行接受現實開始採取較寬鬆的貨幣政策，以扶起增速放緩的中國經濟。再者，A股由○七年的6,124點高位，也實在經歷了太漫長的調整，民間積壓的購買力，一瞬間釋放出來。

散戶愈積極入市，A股接近短期浪頂的機會愈高。（資料圖片）

太陽日誌（2014/12/5）

以一個八成交易來自散戶的股票市場，到底可以有幾唔理性，依家真係好難估計。如果純睇技術走勢，○七年十月的6,124點，跌到落最低1,664點反彈，○九年因中央四萬億救市，滬綜指曾反彈見3,478點，預計會係中短期最大阻力，升穿可以確認A股自○七年一浪低於一浪的形勢有所改變。

如果由開戶人數，中國結算啱啱公布截至廿八日的一星期，新增A股開戶數目37萬，是連續七星期高於20萬水平，股市生力軍是源源不絕，不過，同○七年「癲」峰期的單周166萬個新增散仔，又仲有一段距離。股市永遠是贏的人少，輸的人多的英雄地，經驗告訴我們，當銀行大利市機前逼滿散戶、股市成交額愈高，也就距離短期浪頂愈近。

兩市交投創紀錄

前日，即本周三，滬深兩市的總成交金額，達到創紀錄的9,148億元人民幣，不單創中國股市紀錄，也創世界股市紀錄，○七年美國次按風暴爆發前，華爾街最高單日成交約1,400億美元，如果以今日匯率計算，前日滬深股市成交額達到1,486億美元，刷新美股當年最癲紀錄。

有趣的是，今日中國股票市場總市值4.6萬億美元，只及當年美股總市值19萬億美元四分之一咁上下，近期A股炒風有幾瘋狂可見一斑。綜合而論，小弟相信A股短期以尖頂回落，進入調整的機會極大，不過到底係三千二定三千四，以一個充斥狂熱散戶的市場來說，真係好難估計，○九年以來，中央政府曾多次出口術托市，今次再加埋有貨幣政策配合，可以肯定今次將會係最成功的一次。

炒降準承受風險

講番港股，恒指尋日升403點，收23,832點，但睇番周一至今，恒指隔住嚟低開高收，高開低收，現時指數比上周五收市的23,987點，仲跌緊155點，主板成交1,174億，是第四日企住千億水平樓上。

滬港通的南下配額，通車至今累積用咗46億人仔，幫到港股幾多，股民係心知肚明，反而兩隻A股ETF，安碩A50（02823）及南方A50（02822）加埋日日過百億成交（相當多的沽空），令港股交易額有番多少生氣。

近幾日港股高成交額下，沽空金額亦都唔嘢少，尋日由周三200億元落返去164億，沽空成交佔比仲係高企於13.96%，唔少唔信A股可以好似《星際啟示錄》咁反地心吸力的基金經理，不斷增加幾隻A股ETF的淡倉沽空，整體大市亦都陰陽怪氣，資金集中湧入指數重磅國企，反之，唔少基金增長股及二三線股，沽到開巷，尋日創新低的股票66隻之多，大升市中，整體大市升跌股份比例，係1對1.1，完全唔似一個400幾點升市應該有的氣氛。

牛熊證炒家同期指客，今日係跟又死唔跟又死，外圍方面，今晚美國出十一月就業數據、歐洲第三季GDP將會出籠，就算話佢影響唔大，但中資股炒到半天高，個個賭緊人行周末會宣布第一次降準，降都好地地，萬一唔降的話，會唔會出現反高潮，真係自己諗過受唔受得住，先好坐衍生工具過周末。