七月暴炒妹推介過嘅暢捷通（01588）成功破位，尋日逆市升逾2%，收報17.24元，即市創出17.4元的一年新高，睇番成交亦都配合，保力加通道擴闊，整固後料有力再上，下站阻力上移到19蚊，支持就喺50日線15.6元。

暢捷通係一間小微企業軟件及服務供應商，首九個月收入2.3億元人仔，少賺18.7%至5,918萬元人仔，原因係第三季兩項雲服務產品研發資本化項目，除開始攤銷計入費用外，後續研發費用開始列支，同埋第三季係公司軟件包銷售淡季。查實上次亦提過，今年公司會推企業雲應用及明年會開雲平台，起步頭幾年要有心理準備拉低毛利率。

不過，近年旗下T+系列軟件產品銷售大增，暢捷通已獲人行授予非金融機構支付業務許可證，即係話可以在內地提供互聯網支付服務及銀行卡收單服務，為期五年，有助提升盈利能力。同時，公司積極提高資產使用率，繼七月斥逾2億元人仔投資後，八月各以4,000萬元及1億元人仔閒資，買咗華夏銀行結構性存款產品同天津銀行理財產品，持續提升投資效益。