今個星期，睇實個港股飄到咁，缸邊客唔食暈浪丸都恐怕頂唔順，周一個市無情白事狂插620點，前日好番些少，內銀內險帶住恒指反彈286點，尋日又再隊番225點，恒指收報23,428點。

內銀股最賺錢年代可能已成過去，業績前景未樂觀。（資料圖片）

太陽日誌（2014/12/3）

A股改寫緊四十個月以來高位紀錄，與港股的弱勢，形成強烈反差，尋日跌市成交不跌反升，去到1,231億，沽空成交200億破晒紀錄，佔大市成交比例升至16.3%。印象中，海嘯之後都未見過咁場面，單係兩隻A股ETF，安碩A50（02823）及南方A50（02822）佔85億沽空，相當於沽空金額的四成二。

內地連續六星期A股開戶散戶高企20萬樓上，開始見到全民皆股炒到出煙，而機構投資者佔交易額八成以上的香港魚缸，擺出一副完全唔相信的姿態。到底今次係內地紅色散戶定係環球大孖沙睇錯市，睇相佬呃你十年八年，呢啲咁極端市況，相信好快會有分曉。

今年滬綜指累積升幅三成一，係全球最好表現股市之一，仲要大部分升幅在九月後，內地散戶開始炒人行鬆手後先出現，滬綜指9日RSI去到92.5的極超買水平，直頭有啲似過山車去到俯衝前一刻的勢頭，最陰公係港股本已弱勢，如果A股隊埋一份，年尾流流隨時累埋街坊咁就陰公。

中廣核電熱爆錶

今年新股超購王，眾望所歸由內地核電一哥中廣核電力（01816），以市傳的286倍超額奪冠，以凍結資金估計達3,500億元計，將會排在港股史上凍資王的第八位。

以超購達一百倍，將回撥總發行股數兩成到公開認購部分，雖然未知分配側向「大飛」抑或「細飛」，篤一篤機，估計平均分配比例1.4%左右，1.5厘孖展入「大飛」，計落升兩個巴仙左右已經夠洗費，以暫時街外唱緊一開升兩成樓上，一手或者些少孖展入去抽獎的，應該點都穩坐緊釣魚船，有錢落袋。

不過，值得留意今次中廣核電力罕有地有過百張「頂頭槌飛」，佔凍資額近兩成，恐怕大飛客分派比例可能相當奀，有口痕友仲衰到話今次班「頭槌飛」，隨時蝕息都未定。

工行好消息出盡

輪都輪到工行（01398）發優先股，尋日一早公布，指標息率介乎6至6.25厘，私人銀行班老友話，尋日聽電話聽到晏都無時間食，無他嘅，之前中行（03988）優先股，以6.75厘定價，因為近排人行減息，唔經唔覺去到6.1厘（息跌意味優先股價升咗），一比較下，工行優先股貸評高中行一格，就算真係上限6厘定價，段估都有多少水位可以升吓，所以唔單止好息之徒，尋日仲吸引到一班炒家捧場，據聞因為認購反應熱爆，最終提早拉閘。

尋日工行正股股價，反而見好消息出盡被掟的情況，早市高見5.34元，最後撻番落5.22元倒跌一格收市。睇走勢，是繼七月同九月之後，又一次在5.34元阻力位頂住，技術走勢認真麻麻。

以昨日收市價計，工行一四及一五年的預期股息率有6.6及7.1厘，一班定息產品玩家，6厘都追工行優先股，而股市炒家連6.6厘工行正股都沽之而後快，講來講去都係反映一件事，內地銀行在資產質素轉壞、人行不對稱減息、利率市場化等等市場因素影響下，最賺錢年代可能已成過去，甚至估未來業績會因此倒退的，也是大有人在。