呢幾年有唔少發展商先後進駐馬鞍山區，嚟緊馬鞍山白石耀沙路住宅地會喺今個禮拜五截標。劉Sir唔少測量師老友，都以今年批出隔籬幅白石住宅地做參考，估計每方呎樓面地價約莫4,000至4,300元水平，估值最高大約16.7億元。劉Sir相信新地（00016）同埋恒地（00012）等區內有項目嘅發展商，都幾大機會入標競投。

馬鞍山白石耀沙路住宅地（箭嘴示），佔地約25.3萬方呎。（資料圖片）

理想城市張聖典指，馬鞍山白石地皮適合作中低密度住宅發展。

近年馬鞍山住宅地供應

劉Sir知道，呢幅馬鞍山白石耀沙路住宅地，佔地大約25.3萬方呎，提供約莫38.8萬方呎住宅樓面。

區內新盤旺 或攻中小戶

其實唔經唔覺馬鞍山區今年已先後批出咗3幅住宅地，其中可以做直接比較嘅，就係毗鄰規模相若嘅馬鞍山白石住宅地，地皮喺今年三月由新地動用超過18億元投得，樓面呎價大約4,241元。

至於鄰近馬鞍山市中心嘅馬錦街及恒光街兩幅限量地，就由宏安（01222）同埋錦華實業合組財團，喺今年六月同八月合共以超過11.3億元奪得；而區內近年呎價最高嘅住宅地，係長實（00001）二○一二年十一月以樓面呎價5,160元投得嘅烏溪沙落禾沙地皮。

老友理想城市張聖典話，呢幅馬鞍山白石耀沙路地皮，可以做中低密度住宅發展。之不過，附近有提供中小型單位嘅新盤近排都賣得好好，所以中標財團將來以中小型單位開則都唔定，佢相信區內有項目嘅新地同埋恒地等財團，都有機會入標競投。佢估計地皮每方呎樓面地價約莫4,000元，估值約15.5億元。

發展密度高 本周五截標

本周五截標嘅耀沙路地皮附近真係有唔少新盤，數到最近期嘅迎海．星灣御銷情理想，項目平均實用呎價約1.29萬元。

至於高緯環球張翹楚就覺得，耀沙路地皮位置距離鐵路站較遠，雖然喺正新地今年投得地皮嘅隔籬，但呢幅地嘅發展密度始終高啲，佢都估計樓面呎價約莫4,000元，比起毗鄰地皮低少少。