華爾街三大指數愈升愈有，可惜係港股改不了行三步，退兩步的悶況，十一月期指結算日，個市朝早抽過一浸，好快打回頭，之後全日都無貨賣，恒指跌107點，報24,004點，完全無視A股氣勢如虹，再創今浪新高收2,630點。

下半年銷售旺季推動下，六福全年業績有望超標。（資料圖片）

綜合大行預測六福業績（港元）

太陽日誌

尋日表現最標青的，要數一眾油田服務類股份，第四屆中國頁岩氣發展大會舉行，預期會上將會就國土資源部頁岩氣區塊第三輪招標等作出交流，安東油服（03337）升16%，宏華（00196）升11.4%，華油能源（01251）升7.8%，百勤油服（02178）升4.6%。

一早打去問隻中廣核電力（01816）孖展情況，比經紀老友笑「遲唔遲啲」，話說尋日第一日IPO，一開波唔少有做孖展的證券行，孖展額度已經提光，冇事先單聲的客仔，唔少都食閉門羹。睇情況，中廣核成為今年新股集資王，應無懸念。

中廣核電爭崩頭

顧名思義，中廣核電力在內地從事核電營運及管理，六月底有11台營運中的核機組，佔中國全國核電機組的五成五，所以佢亦將會係中國上市最大核電公司，集資最主要用途包括收購台山核電41%權益，以及在建核電廠資本開支。

因為阿爺重啟核電投資，市面上無第二隻選擇，加埋十八羅漢（基礎投資者）早早入飛護航，認頭咗超過13億美元貨源，中廣核電聲勢可謂一時無倆，以招股價介乎2.43至2.78元，發行88.25億股H股，畀散戶公開認購部分僅得5%，即4.41億股，除非超額到50至100倍或100倍至上，會回撥至發行上限10及20%，換句話，如果IPO入飛額去到1,225億元，就有機會啟動回撥兩成。

點計入大飛睇分配比例，都好難去到3至4%，即使開出有15至25%升幅，左計右計，最後都係打消大飛抽獎念頭，諗吓其他已經上市的新能源股好過。不過，如果看官諗住抽返三、兩手，搵餐茶飲吓無傷大雅。

銷售旺季有幫助

六福（00590）公布中期業績倒退16.6%，賺8.04億元，股價卻急彈10.3%，收報25.6元。觀乎六福業績，其實唔錯，盈利按年倒退，純粹因為去年同期中國大媽搶金，使半年的盈利基數大升。期內毛利率23.9%，相對去年的20.1%有所改善，因為金至尊的虧損大幅減少，純利率10.7%，比去年上下半年度的9.6%及9.8%都要理想。

現在半年成績表，交出分析員預期全年大數一半，展望下半年財政年度，即十至明年三月，跨越中西多個消費旺季，按現時趨勢，全年業績超額完成機會十分大，就算跟舊預測賺16.2億元，市盈率不過9.2倍，比周大福（01929）低差不多三分一，息率4.4厘，現價唔貴兼幾吸引，只嫌尋日有少少升得急，分段買諗得過。