將於今日派成績表嘅金源米業（00677），尋日即市創出0.53元的一年新高，收市仍企穩於5毫子關，升逾半成，如果怕利好因素已預先反映，可以等佢去番10日線0.47元再諗，下站阻力上移到0.55元，支持喺0.45元。

金源從事搜購、入口、批發、精細加工、包裝、市場推廣及銷售食米，仲有證券投資、物業投資、經營便利店及餐廳，而本港核心食米業務產品包括「金象」、「袋鼠」等品牌，另亦擁有越南Circle K便利店獨家經營權。

睇番成績表，去年食米業務勁賺億元，可惜便利店業務蝕2,758萬元，令純利倒退9.1%至8,338萬元。

不過，公司喺早前發盈喜，預期截至九月底止六個月溢利將比去年同期大幅增長，原因係錄得出售聯營公司收益。根據資料，金源五月賣咗高爾夫球公司28%股權，預計盈利4,200萬元，照計全年業績亦唔使憂。

早前公司話會繼續擴充越南店舖網絡及增加產品種類，未知成效如何，建議大家可以留意吓中績嘅便利店業務有無改善。