周一港股炒人行減息，狂挾456點，抖咗一日之後，尋日大孖沙趁住十一月期指結算前夕，發動新一輪攻勢，恒指升268點，收24,111點。轉倉前夕所見，周二臨收市前，即月及下月期指突然轉炒高水，春江鴨果然唔係無的放矢，睇尋日成分股除石油及電訊股比較失色之外，50隻藍籌40隻向上，反而整體大市升跌比例1.28對1，無咁一面倒。資金集中掃落去重磅股而非二三四五線股，令尋日大市突破的可信性大大提高，十二月初個市點睇都唔會太差。

內銀股的超低估值，足以抵銷一眾不利因素的負面影響。（資料圖片）

太陽日誌 2014/11/27

石油輸出國組織（OPEC）今日會議，上星期個市傳到似層層，話部分成員國傾向減產托價，但紐約期油由74美元左右彈到去77.8美元，經已無以為繼，前晚打回原形，最低撻落73.71美元，創出四年新低。外電報道，四個產油國的會前會談，未就減產達成共識，只同意每季舉行會議評估油價。已有分析估緊，萬一OPEC唔願減產，油價落到60美元的可能性十分大。

油價前景仍黯淡

事實上，歐洲及日本經濟唔掂，需求回落，中國要改變能源浪費習慣，同污染宣戰，美國的頁岩氣發展迅速坐大，今日已經有條件以天然氣代替石油，變身石油淨輸出國，種種因素結合，油市前途都係一片黑暗。

上星期五，人行突然宣布不對稱減息，幾乎稍為有些少財經知識的，第一個反應都會話對高負債股有利，對銀行不利，但事實係咪咁簡單？君可見高債股的代表中鋁（02600），負債比率高達270%，星期一彈些少之後，好快打回原形。反之，面對存貸息差收窄壓力的內銀股，以工行（01398）為例，連升三日，尋日收5.17元，創咗逾兩個月新高。

資產質素有支持

客觀現實，大孖沙對阿爺終於肯由微刺激轉為強刺激，利用貨幣政策提振經濟的措施，對內地高處不勝寒的樓市，托市之心不言而喻。投資者對銀行資產質素，因樓價下滑而加速轉壞的疑慮，暫得以撫平。再者，今次減息可算是出乎九成分析員預期，基金經理在年底前現金水平偏高的情況下，無辦法唔急急追貨，有足夠流通量又可迅速滿倉的，除內銀股，實無他選。

更重要的是，內銀過去兩年業績保持增幅，但股價卻只能浮浮沉沉。現時工、建（00939）、中（03988）、農（01288）四大行，一五年預期市盈率分別只係4.9倍、4.7倍、4.8倍及4.6倍，連大摩環球銀行股指數平均市盈率11.2倍的一半都無，就算幾隻內銀股出年真係因為阿爺整頓銀行業、利率市場化及不對稱減息，而令業績從高峰期慢慢跌番兩至三成，但內銀股估值都未有耐同國際銀行看齊。

況且，依家內地銀行面對網絡金融競爭，出現存款流失情況，不良貸款周期亦係啱啱見底回升，人行會唔會任由息差收窄到一眾銀行頂唔順？值得反思。講到底，在超低估值下，短期息差收窄壞消息又已經見光，炒內銀股抑或追本身經營麻麻，單靠減息慳錢的重債股，大家不妨好好諗吓。